غیر منصفانہ ریزرویشن پالیسی کشمیریوں کے لیے تباہی کا پیش خیمہ ، سجاد لون

جمعہ 14 مارچ 2025 15:32

سری نگر (اُردو پوائنٹ اخبارتازہ ترین - اے پی پی۔ 14 مارچ2025ء) بھارت کے غیر قانونی زیر قبضہ جموںوکشمیر میں پیپلز کانفرنس کے سربراہ اور رکن اسمبلی سجاد غنی لون نے ریزرویشن پالیسی کو کڑی تنقید کا نشانہ بناتے ہوئے کہا ہے کہ اس پالیسی کے ذریعے کشمیری بولنے والے لوگوں کو پسماندہ کرنے اور ان پر معاثرتی بالا دستی قائم کرنے کی کوشش کی جا رہی ہے۔

کشمیر میڈیاسروس کے مطابق سجاد غنی لون نے اسمبلی میں اپنی تقریر کے دوران کہا کہ ریزرویشن پالیسی خطے کے انتظامی اور سیاسی ڈھانچے میں کشمیری بولنے والوں کی موجودگی کو کم کرنے کے لیے بنائی گئی ہے۔انہوں نے اعداد و شمار کا حوالہ دیتے ہوئے کہا کہ ہم نے دیکھا کہ کشمیریوں کی بہت کم تعداد مقابلہ جاتی امتحانات میں کوالیفائی کر رہی ہے، ایسا نہیں ہے کہ وہ نا اہل ہیں لیکن انہیں دانستہ طور پر مسابقتی جگہ سے باہر کیا جا رہا ہے۔

(جاری ہے)

سجاد لون نے کہا کہ کشمیریوںکو بے اختیار کیا جا رہا ہے اور ان پرمعاشرتی بالا دستی قائم کرنے کی کوشش کی جا رہی ہے اور اگر یہ رحجان جاری رہا تو آپکو سول سیکرٹریٹ میں گنتی کے کشمیری ہی ملیں گے۔انہوںنے کہا کہ موجودہ ریزرویشن پالیسی کے سنگین اثرات ہونگے ۔ انہوںنے مقبوضہ علاقے کی حکومت پر زور دیا کہ وہ غیر منصفانہ ریزرویشن پالیسی کو دوست کرے۔انہوں نے مزید کہا کہ بھارتی حکومت ایسے اقدامات کر رہی ہے جن کے طویل مدتی منفی نتائج ہو سکتے ہیں، آپ میرٹ کو دیوار سے لگارہے ہیں اور مستحق طلباکو کالجوں میں داخلہ دینے سے انکار کر رہے ہیں۔