ایس ایم ایز اقتصادی ترقی کی کلید: درپیش مسائل حل کرنے پر توجہ دی جائی: ناصر منصور قریشی

جمعہ 14 مارچ 2025 17:42

اسلام آباد(اُردو پوائنٹ اخبارتازہ ترین - این این آئی۔ 14 مارچ2025ء)اسلام آباد چیمبر آف کامرس اینڈ انڈسٹری (آئی سی سی آئی) کے صدر ناصر منصور قریشی نے کہا ہے کہ چھوٹے اور درمیانے درجے کے کاروبار (SMEs) پاکستان کی معیشت میں ریڑھ کی ہڈی کی حیثیت رکھتے ہیں، جو جی ڈی پی میں 40 فیصد اور برآمدات میں 30 فیصد حصہ ڈالتے ہیں لیکن اس کے باوجود انہیں بڑے چیلنجز کا سامنا ہے۔

چیمبر ھاوس کا دورہ کرنے والے کاروباری رہنماؤں کے ساتھ بات چیت میں صدر قریشی نے اس سلسلے میں جن اہم رکاوٹوں کا ذکر کیا ان میں محدود فنانسنگ، پرانی ٹیکنالوجی، اور ہنر مند انسانی وسائل کی کمی شامل ہیں۔انہوں نے سمال اینڈ میڈیم انٹرپرائزز ڈویلپمنٹ اتھارٹی (سمیڈا) پر زور دیا کہ وہ نوجوانوں کو روزگار کی فراہمی اور اقتصادی ترقی کو تیز کرنے پر توجہ دیے۔

(جاری ہے)

انہوں نے کہاکہ آئی سی سی آئی ایک کاروباری دوستانہ ماحولیاتی نظام کی تعمیر کے لیے حکومتی اداروں کے ساتھ مل کر کام کرنے کے لیے پرعزم ہے۔صدر قریشی نے بتایا کہ آئی سی سی آئی یونیورسٹیوں کے ساتھ مل کر ایک جدید ریسرچ اینڈ ڈیولپمنٹ سینٹر کے قیام کا ارادہ رکھتا ہے اور یہ کہ علاقائی یونیورسٹیوں کے ساتھ مفاہمت ناموں کا مقصد اکیڈمیا اور صنعت کے درمیان فرق کو ختم کرنا ہے اور نوجوانوں کو صرف ملازمت کے متلاشی ہی نہیں بلکہ روزگار تخلیق کرنے والے بننے کے لیے بااختیار بنانا ہے۔ صدر قریشی نے نتیجہ اخذ کیا کہ "اسٹارٹ اپس کو آگے بڑھا کر، جدت طرازی کو اپنا کر اور SMEs کے چیلنجز سے نمٹ کر ہم اقتصادی ترقی کو بڑھاوا دے سکتے ہیں اور روزگار کے بے شمار مواقع پیدا کر سکتے ہیں۔