محکمہ زکوٰةوعشر نے گذشتہ 9ماہ میں آزادکشمیر کے ڈسٹرکٹ ہسپتالوں میں 953 مریضوں کا مفت علاج کروایا

بدھ 19 مارچ 2025 17:49

مظفرآباد (اُردو پوائنٹ اخبارتازہ ترین - اے پی پی۔ 19 مارچ2025ء) وزیر اعظم آزاد کشمیر چوہدری انوار الحق کے نادارو غرباء کے مسائل میں خصوصی دلچسپی سے محکمہ زکوٰةوعشر نے گذشتہ 9ماہ میں آزادکشمیر کے ڈسٹرکٹ ہسپتال ہا میں 953 غریب داخل مریضوں کا مفت علاج کروایا۔محکمہ کے مطابق فی مریض اوسطاً 10,778 روپے خرچ آیا، یہ رقم ایڈوانس میں طبعی ادارہ جات کو بذریعہ کراس چیک فراہم کی گئی۔

جاری مالی سال یکم جولائی2024 سے 19مارچ2025 (نو ماہ) تک آزادکشمیر کے ڈسٹرکٹ ہیڈ کوارٹر ہسپتال،اے آئی ایم ایس ،سی ایم ایچ میں کل953 داخل مریضوں کے علاج معالجہ کیلئے سہولیات فراہم کی گئیں۔ان میں 445 خواتین اور508 مردشامل ہیں۔محکمہ زکوٰةوعشر نے یہ رقم بذریعہ کراس چیک ڈسٹرکٹ ہیڈکوارٹر ہسپتال سی ایم ایچ،اے آئی ایم ایس کے سربراہان کوبذریعہ کراس چیک اداکی جس سے تحت قواعد مستحق مریضوں کا علاج معالجہ ہوا۔

(جاری ہے)

اس وقت تک طبی ادارہ جات کو کل مبلغ1,02,71,250 روپے کی ادائیگی عمل میں لائی جا چکی ہے۔اس موقع پر چیف ایڈمنسٹریٹر چوہدری رزاق نے کہا کہ داخل غریب مریضوں کی ضرورت 10ہزار سے 20ہزار تک ہوتی ہے جس سے غریب لوگوں کو مدد ملی ہے۔اگرکوئی غریب ونادار ہسپتال میں داخل ہے جواپنا علاج معالجہ نہیں کروا سکتا وہ ہسپتال میں قائم زکوٰة ڈسک سے رابطہ کرے تاکہ اس کی مدد کی جاسکے۔