میامی اوپن ٹینس ویمنز سنگلز،آرینا سبالینکا،نائومی اوساکا اور کوکوگف تیسرے رائونڈ میں پہنچ گئی

جمعہ 21 مارچ 2025 23:14

فلوریڈا(اُردو پوائنٹ اخبارتازہ ترین - آن لائن۔ 21 مارچ2025ء)بیلاروس کی نامور ٹینس کھلاڑی ،عالمی نمبر ون اور ایونٹ کی ٹاپ سیڈڈ آرینا سبالینکا ،جاپان کی نامور ٹینس کھلاڑی اور چار گرینڈ سلام ٹائٹلز کی فاتح نائومی اوساکا اور امریکی ٹینس سٹار کوکوگف اپنی فتوحات کو برقرار رکھتے ہوئے میامی اوپن ٹینس ٹورنامنٹ کے ویمنز سنگلز مقابلوں کے تیسرے رائونڈ میں پہنچ گئیں جبکہ امریکا کی سوفیا کینن، قازقستان کی ایلینا ریباکینا اور جمہوریہ چیک کی کترینا سینیاکووا خواتین کے سنگلز مقابلوں کے دوسرے رائونڈ میں ہار کر ایونٹ سے باہر ہوگئیں ۔

میامی اوپن کے دلچسپ مقابلوں کا سلسلہ ہارڈ روک سٹیڈیم، فلوریڈا میں جاری ہے۔خواتین کے سنگلز مقابلوں کے دوسرے رائونڈ میں بیلاروس کی نامور ٹینس کھلاڑی ،عالمی نمبر ون اور ایونٹ کی ٹاپ سیڈڈ آرینا سبالینکا نے انتہائی شاندار کارکردگی کامظاہرہ کرتے ہوئے بلغارین حریف کھلاڑی وکٹوریہ کونسٹنٹینوا ٹومووا کو سٹریٹ سیٹس میں شکست دے کر تیسرے رائونڈ کے لئے کوالیفائی کرلیا۔

(جاری ہے)

جاپان کی نامور ٹینس کھلاڑی اور چار گرینڈ سلام ٹائٹلز کی فاتح نائومی اوساکا نے بھی دوسری رکاوٹ عبور کر لی،انہوں نے روسی حریف کھلاڑی لیوڈمیلا دیمتریونا سمسونوواکو سٹریٹ سیٹس میں ہرا کر تیسرے رائونڈ کے لئے کوالیفائی کرلیا۔ایک اور میچ میں امریکی ٹینس سٹار کوکوگف نے شاندار کھیل پیش کرتے ہوئے ہم وطن حریف کھلاڑی سوفیا کینن کو سٹریٹ سیٹس میں با آسانی ہرا کر ٹورنامنٹ کے تیسرے رائونڈ کے لیے کوالیفائی کرلیا۔