نیشنل ٹی ٹوئنٹی کپ ، دفاعی چیمپئن کراچی اورلاہورکی ٹیمیں ایونٹ سے باہر ہوگئیں

پیر 24 مارچ 2025 15:12

فیصل آ باد (اُردو پوائنٹ اخبارتازہ ترین - اے پی پی۔ 24 مارچ2025ء) نیشنل ٹی ٹوئنٹی کپ میں دفاعی چیمپئن کراچی اور لاہور کی ٹیمیں ایونٹ سے باہر ہوگئیں،ایبٹ آباد اور ملتان نیشنل ٹی ٹوئنٹی کپ کے سیمی فائنل میں پہنچ گئیں۔ اقبال سٹیڈیم فیصل آباد میں کھیلے گئے پہلے کوارٹرفائنل میں ایبٹ آباد نے لاہور وائٹس کو 6 وکٹوں سے شکست دی۔دوسرے کوارٹرفائنل میں ملتان نے دفاعی چیمپئن کراچی وائٹس کو 7 رنز سے ہرادیا۔

پہلے کوارٹرفائنل میں ایبٹ آباد نے ٹاس جیت کر لاہور وائٹس کو بیٹنگ دی جس نے 20 اوورز میں 5 وکٹوں پر 130 رنز بنائے۔محمد اخلاق 59 رنز بناکر ٹاپ سکورر رہے۔خالد عثمان نے 2 وکٹیں حاصل کیں۔ایبٹ آباد نے 18 ویں اوور میں 4 وکٹوں کے نقصان پر مطلوبہ سکور پورا کرلیا۔ کامران غلام نے 2 چھکوں اور 6 چوکوں کی مدد سے58 رنز ناٹ آؤٹ کی اننگز کھیلی اور پلیئر آف دی میچ قرار پائے۔

(جاری ہے)

دوسرے کوارٹرفائنل میں ملتان نے ٹاس جیت کر پہلے بیٹنگ کرتے ہوئے 9 وکٹوں پر 155 رنز بنائے۔ذیشان اشرف نے9 چوکوں اور 3چھکوں کی مدد سے60 رنز سکور کیے۔سعود شکیل اور ہارون ارشد نے2،2 وکٹیں حاصل کیں۔جواب میں کراچی وائٹس8 وکٹوں پر 148 رنز بناسکی۔ ہارون ارشد42 رنز بناکر ٹاپ سکورر رہے۔کپتان سعود شکیل صفر اور شان مسعود 3 رنز پر آؤٹ ہوگئے۔ محمد اسماعیل نے34 رنز دے کر 3 وکٹیں حاصل کیں۔فیصل اکرم نے دو کھلاڑی آؤٹ کیے۔ذیشان اشرف پلیئر آف دی میچ قرار پائے۔مزید دو کوارٹرفائنل آج پیر کو کھیلے جائیں گے۔