Live Updates

پاکستان سپر لیگ 10 ، لاہور قلندرز اور پشاور زلمی کی ٹیمیں واحد میچ میں (کل)پنجہ آزمائی کریں گی

جمعرات 8 مئی 2025 17:04

راولپنڈی (اُردو پوائنٹ اخبارتازہ ترین - این این آئی۔ 08 مئی2025ء)پاکستان سپر لیگ 10 میں (کل)جمعہ کو واحد میچ لاہور قلندرز اور پشاور زلمی کے مابین کھیلا جائے گا۔ پاکستان کرکٹ بورڈ(پی سی بی )کے زیر اہتمام پی ایس ایل کے دسویں ایڈیشن میں شائقین کرکٹ کو انتہائی دلچسپ اور کانٹے دار مقابلے دیکھنے کو مل رہے ہیں۔ لیگ کے 28 ویں میچ میں جمعہ کو لاہور قلندرز اور پشاور زلمی کی ٹیمیں راولپنڈی کرکٹ سٹیڈیم،راولپنڈی میں مدمقابل ہوں گی۔

میچ رات 8 بجے شروع ہو گا اور فلڈ لائٹس کی روشنی میں کھیلا جائے گا۔لاہور قلندرز کو مایہ ناز فاسٹ بائولر شاہین شاہ آفریدی لیڈ کر رہے ہیں اور دیگر نمایاں کھلاڑیوں میں فخر زمان،حارث رئوف،ثام بلنگز،ٹام کیوران ،کوسل پریرا،ڈیرل مچل ،آصف علی اورسکندررضا شامل ہیں۔

(جاری ہے)

لاہور قلندرز کی ٹیم 9پوائنٹس کے ساتھ پوائنٹس ٹیبل پر چوتھے نمبر پر ہے ۔

لاہور قلندرز نے 9 میچز کھیلے ہیں جن میں اس کو چار میچز میں فتح جبکہ چار میچز میں شکست کا سامنا کرنا پڑا تھا۔ پشاور زلمی کی ٹیم مایہ ناز بلے باز بابر اعظم کی زیر قیادت میدان میں اترے گی، دیگر نمایاں کھلاڑیوں میں صائم ایوب،عبدالصمد،مچل اون ،محمد حارث،محمد علی،ناہید رانا،الزاری جوزف،عارف یعقوب،لیوک ووڈ اور علی رضا شامل ہیں۔پشاور زلمی کی ٹیم 8میچز کھیل چکی ہے جن میں اس کو 4 میچز میں فتح نصیب ہوئی جبکہ 4 میں شکست ہوئی ہے۔پشاور کی ٹیم ٹیبل پر 8 پوائنٹس کے ساتھ پانچویں نمبر پر ہے۔ ٹورنامنٹ کا فائنل 18 مئی کو قذافی سٹیڈیم، لاہور میں کھیلا جائے گا۔