خانقاہی نظام کا مقصد للہ اور اس کے رسولﷺ کی محبت کو فروغ دینا ہے،سید مصطفی کمال

کراچی (اُردو پوائنٹ اخبارتازہ ترین - این این آئی۔ 24 مارچ2025ء) وفاقی وزیر صحت سید مصطفی کمال نے کہا ہے کہ خانقاہی نظام کا مقصد للہ اور اس کے رسولﷺ کی محبت کو فروغ دینا ہے،صوفیائے کرام کی خانقاہیں ہمیشہ سے للہ کے بندوں کی داد رسی، تربیت، تعلیم اور ذکر و فکر کا وہ مرکز رہی ہیں، جہاں سے کروڑوں تشنگان معرفت فیض یاب ہوئے اور لاکھوں گم گشتہ راہیوں کو محبت الہی کی منزل کا سراغ ملا ہے ۔

ان خیالات کا اظہار انھوں نے حضرت علی کرم اللہ وجہہ و حضرت سید شاہ خلیل اللہ جنیدی کے سالانہ عرس کے موقع پر خطاب کرتے ہوئے کیا۔اس موقع شیخ طریقت سید شاہ محمد اسداللہ جنیدی، ڈپٹی کمشنر ضلع وسطی طہ سلیم، ڈاکٹر خرم آسی پروفیسر ڈاکٹر جلال الدین احمد نوری سابق ڈین فیکلٹی آف اسلامک اسٹڈیز کراچی یونیورسٹی و دیگر کا اظہار خیال۔

(جاری ہے)

وفاقی وزیر نے کہاکہ خانقاہوں نے صوفی ازم کو پوری مسلم دنیا میں پھیلانے میں اہم کردار ادا کیا ہے برصغیرمیں خانقاہیں علم، روحانیت اور فنون کے مراکز کے طور پر مشہور رہی ہیں اور آج بھی، کئی خانقاہیں صوفی روایات اور عملی تصوف کے مراکز کے طور پر موجود ہیں۔

ڈپٹی کمشنر ضلع وسطی طہ سلیم نے کہاکہ اولیا اللہ کی تعلیمات ہی ہمارے مسائل کا حل ہیں ۔عرس کی تقریب سے خطاب کرتے ہوئے پیر طریقت سید شاہ محمد اسد اللہ جنیدی نے کہا کہ حضرت علی کرم اللہ وجہہ کاعلمی مقام و مرتبہ، ان کی قرآن فہمی، حقیقت شناسی اور فقہی صلاحیت تمام اولین و آخرین میں ممتاز و منفرد تھی۔ قدرت نے انہیں عقل و خرد کی اس قدر ارفع و اعلی صلاحیتوں سے نوازا تھا کہ جو مسائل دوسرے حضرات کے نزدیک پیچیدہ سمجھے جاتے تھے، انہی مسائل کو وہ آسانی سے حل کردیتے تھے۔

عرس مبارک کے آخری سیشن میں مختلف شعبہ جات میں Phd کرنے والے اسکالرز کی خدمت میں شاہ جنید قادری ایوارڈ پیش کئے گئے ۔ ہمدرد یونیورسٹی کے ڈاکٹر انجینئر رضوان اقبال کو سائبر سیکیورٹی میں، ڈاکٹر طیب احمد شیخ کر Handling methods in Evolutionary Algorithm میں، ڈاکٹر محمد احمد سکندر کو ٹیلی کمیونیکیشن انجینئرنگ میں، وفاقی اردو یونیورسٹی شعبہ اسلامک لرننگ سے ڈاکٹر انور اقبال صدیقی کو قطب مدینہ ضیا الدین مدنی، ڈاکٹر احمد حسن مجددی کو علامہ سید سعادت علی قادری، ڈاکٹر محمد نعمان کریم کو اسلامی بینکاری میں سیونگ اکاؤنٹ شریعت کی روشنی میں، ڈاکٹر حافظ علی رضا عابدی کو اسلام کا تصور اعتدال، جامعہ کراچی کے شعبہ اسلامک لرننگ و سیاسیات سے ڈاکٹر محمد خالد خان لودھی، ڈاکٹر محمد نبیل الحق شیخ، ڈاکٹر حکیم محمد ذہیب سمول، ڈاکٹر مفتی ابرار احمد، ڈاکٹر محمد طارق خان، ڈاکٹر انوار الحق، ڈاکٹر مفتی محمد عدنان کو احکام تجارت میں تخفیف اسباب ستہ کی روشنی میں، بیروت سے ڈاکٹر سید مظہر اقبال شامی کو پی ایچ ڈی مکمل کرنے پر شاہ جنید قادری ایوارڈ پیش کئے گئے۔