محکمہ لائیو سٹاک کا مویشی پال حضرات کو جانوروں کو منہ کھر کی بیماری سے بچاؤ کے حفاظتی ٹیکے لگوانے کی ہدایت

بدھ 26 مارچ 2025 16:19

سیالکوٹ (اُردو پوائنٹ اخبارتازہ ترین - اے پی پی۔ 26 مارچ2025ء) محکمہ لائیو سٹاک و ڈیری ڈویلپمنٹ سیالکوٹ کے ڈپٹی ڈائریکٹر ڈاکٹر تنویر احمد نے مویشی پال حضرات کو جانوروں کو منہ کھر کی بیماری سے بچاؤ کے حفاظتی ٹیکے لگوانے کی ہدایت کی ہے ۔انہوں نے کہا کہ اپریل میں جانوروں میں منہ کھر کی بیماری کا خطرہ بڑھ جاتاہے لہٰذا لائیو سٹاک فارمرز سمیت مویشی پال حضرات فوری طور پر اپنے مویشیوں کو منہ کھر کی بیماری سے بچائوکے ٹیکے لگوائیں تاکہ انہیں بعدازاں کسی پریشانی یا مالی نقصان کا سامنانہ کرنا پڑے۔

(جاری ہے)

ڈاکٹر تنویر احمد نے کہا کہ منہ کھر وائرس جانوروں کے منہ اور کھروں کے درمیان کھال پر حملہ کرتاہے جس سے بھینسوں و گائیوں کی زبان، تالو، مسوڑھوں، ہوانہ اور کھروں کے درمیان چھالے پڑ جاتے ہیں جس سے ان کو تیز بخار ہو جاتا ہے اور وہ خوراک کھانا بندکرنے سمیت دودھ کی پیداوار بھی کم کردیتے ہیں۔اسی طرح بھیڑوں و بکریوں کے منہ میں سرخ دھبے نظر آتے ہیں اور رال ٹپکنا شروع ہو جاتی ہے۔ انہوں نے بتایاکہ تمام ویٹرنری ہسپتالوں، ڈسپنسریوں میں متعلقہ ٹیکے وافر مقدار میں موجودہیں۔ اس ضمن میں مزید معلومات یا رہنمائی کےلئے محکمہ لائیوسٹاک کی ہیلپ لائن پر بھی مفت رابطہ کیا جا سکتا ہے۔