نیشنل پریس کلب اسلام آباد  کے رمضان فیملی فیسٹیول کے سلسلے کے دوسرے پروگرام کا انعقاد

اسلام آباد (اُردو پوائنٹ اخبارتازہ ترین - اے پی پی۔ 26 مارچ2025ء) نیشنل پریس کلب(این پی سی) اسلام آباد  کے رمضان فیملی فیسٹیول کے سلسلے کا دوسرا پروگرام این پی سی اسلام آباد میں منعقد ہوا جس میں ممبران اور ان کے بچوں نے کثیر تعداد میں شرکت کی۔ بچوں کے مابین قرآت اور نعت شریف کے مقابلے ہوئے، مقابلوں میں شرکت کرنے والے تمام بچوں میں نقد انعامات تقسیم کئے گئے۔

پروگرام کی نظامت کے فرائض سیکرٹری این پی سی نیئر علی نے سرانجام دیئے۔ اس موقع پر صدر این پی سی اظہر جتوئی کا کہنا تھا کہ نیشنل پریس کلب کی یہ روایت رہی ہے کہ وہ اپنے ممبران اور ان کی فیملیز کی تفریح اور انہیں خوشیاں فراہم کرنےکیلئےمواقع کی تلاش میں رہتا ہے، یہی وجہ ہے کہ یہ سلسلہ رمضان فیملی فیسٹیول یا عید ملن پارٹی کی صورت میں جاری رہتاہے، یہ سلسلہ آئندہ بھی جاری رہے گا۔

(جاری ہے)

سیکرٹری نیئر علی نےکہا کہ این پی سی انتخابات میں مصروفیت کی وجہ سے اس سال رمضان فیملی فیسٹیول کی تیاری کیلئے زیادہ وقت نہیں مل سکا تاہم اس کے باوجود این پی سی کی قیادت نےاپنے ممبران اور انکی فیملیز کیلئے اس پروگرام کوحتمی شکل دی ۔ انھوں نے کہا کہ  راولپنڈی کے بعد آج اسلام آباد میں بھی اپنے ممبران کی فیملیز کی میزبانی کر رہے ہیں جو کہ ہمارےلئےخوشی و مسرت کا باعث ہے۔

فنانس سیکرٹری وقار عباسی نے کہا کہ این پی سی رمضان فیملی فیسٹیول اب ایک برانڈ بن چکا ہے جسکا ممبران اور انکی فیملیز سارا سال انتظار کرتے ہیں۔ رمضان فیملی فیسٹیول پروگرام کے مہمان خصوصی وزیر مملکت برائے بین المذاہب ہم آہنگی اور مذہبی امور کھیل داس کوہستانی، ،سابق وزیر اعظم آزاد کشمیر عبدالقیوم نیازی، صدر پی پی پی آزاد کشمیر چوہدری یٰسین،سابق صدر اسلام آباد چیمبر،ظفر بختاوری،، سیف الرحمان عطاری گروپ اورپیر عاصم گیلانی تھے۔

تقریب میں پی ایف یو جے کے صدر افضل بٹ، صدر این پی سی اظہر جتوئی، سیکرٹری فنانس وقار عباسی، سابق صدورطارق چوہدری، انور رضا، شہریار خان سمیت ایگزیکٹو اور گورننگ باڈی کے اراکین اور دیگر ممتاز سیاسی ، سماجی، مذہبی اور کاروباری شخصیات شامل ۔ اسلام آباد میں ہونے والے این پی سی رمضان فیملی فیسٹیول میں دو سو سے زائد فیملیز کے تقریبا سات سو بچوں نے شرکت کرکے تقریب کو چاند چاند لگا دیئے ، پروگرام میں شرکت کرنے والے تمام بچوں کو نقد انعامات اور سرٹیفکیٹ دیئے گئے۔

پروگرام میں شرکت کرنے والے ممبران نے این پی سی رمضان فیسیٹول کو سراہتے ہوئے این پی سی کے صدر اظہر جتوئی، سیکرٹری نیئر علی اور فنانس سیکرٹری وقار عباسی سمیت پوری باڈی کی کاوشوں کو خراج تحسین پیش کیا اور اس سلسلے کو مستقبل میں بھی جاری رکھنےکا مطالبہ کیا ۔