صوبائی وزراء شافع حسین ،بلال یاسین کی داتا دربار حاضری ، چادر چڑھائی

داتا دربار توسیعی پراجیکٹ پر پیش رفت کا جائزہ ،ڈائریکٹرپراجیکٹس اوقاف نے بریفنگ دی

بدھ 26 مارچ 2025 21:20

لاہور (اُردو پوائنٹ اخبارتازہ ترین - این این آئی۔ 26 مارچ2025ء)صوبائی وزیر اوقاف ومذہبی امور پنجاب چودھری شافع حسین اور وزیر ہائوسنگ اینڈ اربن ڈویلپمنٹ بلال یاسین نے داتا دربار کا دورہ کیا ۔ ڈی جی اوقاف و مذہبی امور خالد محمود سندھو نے صوبائی وزرا کا استقبال کیا ۔ صوبائی وزراء چودھری شافع حسین اور بلال یاسین نے داتا دربار حاضری دی اور چادر چڑھائی ۔

اس موقع پر پاکستان کی ترقی ،خوشحالی اور سلامتی کیلئے خصوصی دعائیں کی گئیں ۔ صوبائی وزرا نے داتا دربار توسیعی پراجیکٹ پر پیش رفت کا جائزہ لیا ۔ڈائریکٹرپراجیکٹس اوقاف نے صوبائی وزرا کو جاری تعمیراتی کاموں بارے بریفنگ دی ۔صوبائی وزیر اوقاف ومذہبی امور چوہدری شافع حسین نے گفتگو کرتے ہوئے کہا کہ 17کنال اراضی واگزار کرواکرمزار کے احاطے کو وسعت اور سرکلر روڈ کی ری ڈیزائننگ کی جارہی ہے ۔

(جاری ہے)

صوبائی وزیر نے ہدایت کی کہ داتا دربار کے توسیعی پراجیکٹ پر کام کی رفتار تیز کی جائے ۔صوبائی وزیر نے بتایا کہ صوبہ بھر میں مساجد اور مزارات کی تزئین و آرائش کا کام جاری ہے ۔ صوبائی وزیر نے محکمہ اوقاف و مزہبی امور کی اگلے سالانہ ترقیاتی پروگرام کی سکیموں کو جلد حتمی شکل دینے کی ہدایت کی ۔ صوبائی وزیر اوقاف ومذہبی امور چوہدری شافع حسین نے داتا دربار کے تعمیراتی کاموں پر زیرو ٹالیرینس، بروقت اور معیاری تکمیل یقینی بنانے کی بھی ہدایت کی ۔صوبائی وزیر ہائوسنگ واربن ڈویلپمنٹ بلال یاسین نے کہا کہ زائرین کی بڑھتی تعداد کے پیش نظر داتا دربار کی توسیع ازحد ضروری تھی۔انہوں نے بتایا کہ مدینہ منورہ کی طرز پر کنوپیز کی تنصیب سے دربار کی خوبصورتی میں مزید اضافہ ہوا ۔