Live Updates

ایک جوکر ملک کا وزیر دفاع رکھا ہوا ہے ان جوکروں کو میڈیا سے دور رکھیں، عالیہ حمزہ

پنجاب کے بارڈر پر فورس لگی ہے، شریف خاندان کے سارے انٹرسٹ ملک سے باہر ہیں تو یہ خاموش رہیں گے، ہم مودی کو جواب دیں گے اور حکومت کے ظلم بھی سہتے رہیں گے؛ پی ٹی آئی رہنماء کی گفتگو

ساجد علی بدھ 30 اپریل 2025 15:03

ایک جوکر ملک کا وزیر دفاع رکھا ہوا ہے ان جوکروں کو میڈیا سے دور رکھیں، ..

اسلام آباد ( اُردو پوائنٹ اخبارتازہ ترین۔ 30 اپریل 2025ء ) پاکستان تحریک انصاف کی چیف آرگنائزر پنجاب عالیہ حمزہ کا کہنا ہے کہ ایک جوکر ملک کا وزیر دفاع رکھا ہوا ہے ،جب تک ملک کے اندر جنگ کے حالات ہیں ان جوکروں کو میڈیا سے دور رکھیں، مودی نواز جوکرز کے منہ بند کرائیں یہ پاکستان کو نقصان پہنچا رہے ہیں۔ میڈیا سے گفتگو کرتے ہوئے انہوں نے کہا کہ تحریک انصاف کی خواتین کی چادریں کھینچ کر تشدد کا نشانہ بنا کر پنجاب پولیس کے ہاتھ کھل گئے ہیں اور وہ اب پنجاب کے کسی طبقے ڈاکٹر طلباء کسی کو بھی نہیں بخش رہے، مریم نواز خود ایک خاتون ہیں مگر پھر پتا نہیں کیوں یہ خواتین کی اتنی تذلیل کرتی ہیں، ہر طرف ظلم کے بادل منڈھلا رہے ہیں، آپ خود کو پنجاب کی ماں کہلاتی ہیں، پنجاب کے بارڈر پر فورس لگی ہے مگر کیوں کہ آپ کے سارے انٹرسٹ ملک سے باہر ہیں تو آپ خاموش رہیں گے، مگر ہم تو مستحکم پاکستان کے خواہاں ہیں، ہم مودی کو بھی جواب دیں گے اور آپ کے کئے گئے ظلم بھی سہتے رہیں گے۔

(جاری ہے)

ان کا یہ بھی کہنا تھا کہ ارباب اختیار کو نجانے میری کون سی بات بری لگی کہ ایف آئی آرز پر ایف آئی آرز درج ہو رہی ہیں، مجھے تو یاد بھی نہیں کہ کتنے مقدمات درج ہو چکے ہیں، پاکستان کے ہر شہر میں ہے مقدمہ ہے، یہاں تو گرفتاری پہلے ہو جاتی ہے اور بعد میں سوچا جاتا ہے کہ ایف آئی آر کیا دی جائے، شام بھی میرے خلاف ایک نیا مقدمہ درج کر لیا گیا ہے، اسلام آباد ہائی کورٹ راہداری ضمانت کے لیے آئی ہوں تاکہ اے ٹی سی کے سامنے پیش ہو سکوں۔

عالیہ حمزہ نے کہا کہ پر امن احتجاج پر ایک جیسی کاپی پیسٹ والی ایف آئی آرز درج کرنا بند کر دیں، احتجاج، ریلیاں اور کنونشن ہوں گے، یہ ہمارا آئینی و جمہوری حق ہے، ہم تو رول آف لا پر یقین رکھتے اور عدالتوں کے سامنے سرینڈر کرتے ہیں، ہم عدالتوں کو آ کر بتاتے ہیں کہ آپ کی کوئی اوقات نہیں، آپ ضمانت دیں یا کچھ بھی کریں، انہوں نے جب گرفتار کرنا ہوتا ہے تو کر لیتے ہیں۔