وفاقی وزیر قانون اعظم نذیر تارڑ سے نیدرلینڈز کی سفیر کی سربراہی میں وفد کی ملاقات

انسانی حقوق کے فروغ، قانون سازی، پالیسی اصلاحات اور مختلف شعبوں میں دوطرفہ تعلقات کو مضبوط بنانے بارے تبادلہ خیال

جمعرات 27 مارچ 2025 22:15

اسلام آباد(اُردو پوائنٹ اخبارتازہ ترین - این این آئی۔ 27 مارچ2025ء)وفاقی وزیر برائے قانون، انصاف اور انسانی حقوق سینیٹر اعظم نذیر تارڑ سے نیدرلینڈز کی سفیر ہینی فوکل دی وریز کی سربراہی میں ایک وفد نے ملاقات کی۔ملاقات میں انسانی حقوق کے فروغ، قانون سازی، پالیسی اصلاحات اور مختلف شعبوں میں دوطرفہ تعلقات کو مضبوط بنانے کے حوالے سے تبادلہ خیال کیا گیا۔

سفیر نے پاکستان کی جانب سے انسانی حقوق کے ایجنڈے پر عملدرآمد کے لئے کی جانے والی کوششوں کو سراہا اور آئینی ضمانتوں، بشمول مذہبی آزادی اور عقیدے کی آزادی کے تحفظ کے حکومتی عزم کی تعریف کی۔وفاقی وزیر نے پاکستان کے متنوع اور جامع معاشرتی ڈھانچے پر روشنی ڈالی جہاں تمام مذہبی برادریوں کو آئین کے تحت مکمل تحفظ حاصل ہے۔

(جاری ہے)

انہوں نے سفیر کو پاکستان میں حالیہ قانون سازی سے متعلق پیشرفت سے بھی آگاہ کیا جن میں سینیٹ میں نیشنل کمیشن برائے اقلیتی امور بل کا تعارف شامل ہے۔

یہ ایک بااختیار قانونی ادارہ ہے جو اقلیتوں کے حقوق کے تحفظ، بین المذاہب ہم آہنگی کے فروغ، اور اقلیتوں کی قومی ترقی میں مکمل شمولیت کو یقینی بنانے کے لئے کام کر رہا ہے۔سفیر نے وفاقی وزیر کو اپریل میں ڈچ ہاکی کے معروف کھلاڑی فلورس جان بوویلینڈر کے دورہ پاکستان سے بھی آگاہ کیا جو سپورٹس ڈپلومیسی کے فروغ کے لئے اہم قدم ہے۔ انہوں نے وفاقی وزیر کو اس سلسلے میں منعقد ہونے والی سرگرمیوں میں شرکت کی دعوت دی۔

اس موقع پر کھیلوں کے ذریعے دوطرفہ تعلقات کو مزید مضبوط کرنے پر بھی تبادلہ خیال کیا گیا۔مزید برآں انہوں نے مئی میں نیدرلینڈز کے انسانی حقوق کے سفیر کے دورہ پاکستان کے موقع پر ایک ملاقات کی تجویز دی جسے وفاقی وزیر نے دوطرفہ تعاون کو مزید فروغ دینے کے ایک اہم موقع کے طور پر خوش آئند قرار دیا۔ملاقات کے اختتام پر دونوں فریقین نے مشترکہ ترجیحات پر مزید تعاون کے عزم کا اعادہ کیا۔ سفیر نے پاکستان کی مہمان نوازی کو سراہتے ہوئے اس بات پر زور دیا کہ نیدرلینڈز بین الاقوامی سطح پر باہمی مفادات کے فروغ کے لئے پاکستان کے ساتھ قریبی تعاون جاری رکھے گا۔