ایس ای سی پی کے تحت اثاثہ جات مینجمنٹ کمپنیوں کے فنڈ مینیجر رپورٹس میں جامع شرائط متعارف

جمعہ 28 مارچ 2025 12:43

اسلام آباد (اُردو پوائنٹ اخبارتازہ ترین - اے پی پی۔ 28 مارچ2025ء) ایس ای سی پی نے ایک سرکلر جاری کیا ہے جس کے تحت اثاثہ جات مینجمنٹ کمپنیوں کے فنڈ مینیجر رپورٹس میں مزید جامع شرائط متعارف کرائی گئی ہیں۔ ان اقدامات کا مقصد شفافیت کو فروغ دینا اور اجتماعی سرمایہ کاری اسکیموں کے سرمایہ کاروں اور یونٹ ہولڈرز کو بہتر معلومات پر مبنی فیصلے کرنے کے قابل بنانا ہے۔

کلیدی بہتریوں میں خالص اثاثوں کے فیصد کے طور پر اصل اخراجات کی تفصیل، قابل اطلاق سیلز لوڈز، ماہانہ پورٹ فولیو ٹرن اوور ریشوز، رسک ایڈجسٹڈ ریٹرن، ییلڈ ٹو میچورٹی، موڈیفائیڈ ڈوریشن، میکالے ڈوریشن، بیٹا اور سٹینڈرڈ ڈیوی ایشن شامل ہیں۔ اس کے علاوہ، فنڈ مینیجر رپورٹ میں بینچ مارک اور کمٹڈ ریٹرنز کا تقابلی تجزیہ بھی شامل کرنا لازمی ہوگا۔

(جاری ہے)

مزید برآں، ایکسچینج ٹریڈڈ فنڈز کے لیے انڈیکس کی تفصیل اور ٹریکنگ ڈیفرنس ہسٹری کو بھی لازمی قرار دیا گیا ہے۔شرائط میں مستقل مزاجی اور درستگی کو یقینی بنانے کے لیے، میوچل فنڈز ایسوسی ایشن آف پاکستان کو مقررہ مقداری اقدامات کا حساب لگانے کے لیے ایک معیاری طریقہ کار تیار کرنے کا کام سونپا گیا ہے۔یہ اقدام اثاثہ جات مینجمنٹ انڈسٹری میں مارکیٹ کی شفافیت، دیانت داری اور سرمایہ کاروں کے تحفظ کو بہتر بنانے کے لیے ایس ای سی پی کے مسلسل عزم کی عکاسی کرتا ہے۔