پھولوں کے دلکش رنگوں کے پودے تیار کرنے کیلئے اقدامات کا آغاز

بدھ 16 اپریل 2025 15:35

فیصل آباد (اُردو پوائنٹ اخبارتازہ ترین - اے پی پی۔ 16 اپریل2025ء) جامعہ زرعیہ فیصل ۱ٓباد کے فلوریکلچراینڈ ہارٹیکلچر ریسرچ سے متعلق ماہرین گلبانی وچمن آرائی اور زرعی سائنسدانوں نے سدا بہار پھولوں کو مزید خوبصورت بنانے کیلئے تحقیق کا آغاز کردیا ہے اور ابتدائی طور پر گل چین کے پودو ں میں مختلف رنگوں کے پھول تیارکرنے کیلئے ڈرافٹنگ کے کامیاب تجربات کرکے مذکورہ پودے کے سفید و پیلے پھولوں کیساتھ ساتھ سرخ اور نیلے رنگ کے پھولوں کے حامل پودے بھی تیار کر لئے ہیں جو انتہائی دلکشی اور خوبصورتی کے حامل ہیں نیز گلاب کے مختلف رنگوں کے پھولوں کی طرح دیگر پھولوں کے اضافی رنگوں کے پودے تیار کرنے کیلئے بھی اقدامات کا آغاز کر دیا گیاہے۔

(جاری ہے)

فلوریکلچرماہرین نے بتایاکہ قبل ازیں تھائی لینڈ، ہا لینڈ، جرمنی اور دیگر ممالک میں اس قسم کے کامیاب تجربات کئے گئے ہیں جن سے استفادہ کرتے ہوئے وطن عزیز میں بھی ریسرچ کا آغاز کر دیا گیاہے جو کامیابی سے ہمکنار ہو رہی ہے۔ انہوں نے بتایاکہ ان خوبصورت اور رنگا رنگ پھولوں کے پودوں کی تیاری سے ہارٹیکلچروفلوریکلچر کے فروغ میں بھی مدد ملے گی۔