جیسن گلیسپی کو صائم ایوب میں سعید انور کی جھلک دکھائی دینے لگی

دورہ آسٹریلیا اور جنوبی افریقا کے خلاف سیریز میں صائم نے 6 میچز میں 360 رنز بنائے تھے

ذیشان مہتاب ہفتہ 19 اپریل 2025 11:12

جیسن گلیسپی کو صائم ایوب میں سعید انور کی جھلک دکھائی دینے لگی

لاہور (اردو پوائنٹ تازہ ترین اخبار ۔ 19 اپریل 2025ء ) قومی ٹیم کے سابق ہیڈ کوچ جیسن گلیسپی نے نوجوان اوپنر صائم ایوب کو سعید انور سے تشبیہ دے ڈالی۔

سوشل میڈیا پلیٹ فارم پر ایک صارف کے سوال کے جواب میں پاکستانی ٹیم کے سابق ہیڈکوچ جیسن گلیسپی نے ابھرتے ہوئے نوجوان اوپنر صائم ایوب کی تعریفوں کے پُل باندھتے ہوئے ان کا سابق لیجنڈری اوپنر سعید انور سے موازنہ کر ڈالا۔

سابق ٹیسٹ کرکٹر و کوچ نے کہا کہ سعید انور تاریخ کے عظیم ترین کھلاڑیوں میں سے ایک تھے، میں ان کی کچھ جھلک صائم ایوب میں دیکھتا ہوں۔

قبل ازیں سابق کرکٹ تجزیہ کاروں نے بھی صائم ایوب کے مختصر کیریئر اور ان کی جارحانہ بیٹنگ کو دیکھتے ہوئے کہا تھا کہ اوپنر کے کیرئیر کی شروعات ہی لیجنڈری سٹار سعید انور کی طرح ہے ، وہ اگر مستقل مزاجی کا مظاہرہ کریں گے تو پاکستان کیلئے طویل عرصے تک کھیلنے کی صلاحیت رکھتے ہیں۔

(جاری ہے)

واضح رہے کہ دورہ آسٹریلیا اور جنوبی افریقا کے خلاف سیریز میں صائم نے 6 میچز میں 360 رنز بنائے تھے۔

صائم کا مختصر کیرئیر؛

انٹرنیشنل ڈیبیو: مارچ 2023ء (افغانستان کے خلاف ٹی20)

ٹوٹل رنز: 1,377 (تمام فارمیٹس میں)

نصف سنچریاں 5 اور 3 ون ڈے سنچریاں

چیمپئنز ٹرافی کے آغاز سے قبل دورہ جنوبی افریقا میں ٹیسٹ میچ کے دوران صائم انجری کا شکار ہوکر ٹورنامنٹ سے باہر ہوگئے تھے تاہم 3 ماہ بعد ان کی میدان پر واپسی ہوئی ہے۔