پنجاب بھر میں رواں سیزن کپاس کی کاشت کا ہدف 35 لاکھ ایکڑ مقرر کیا گیا ہے ، سیکرٹری زراعت پنجاب

ہفتہ 19 اپریل 2025 16:58

ملتان (اُردو پوائنٹ اخبارتازہ ترین - اے پی پی۔ 19 اپریل2025ء) سیکرٹری زراعت پنجاب افتخار علی سہو نے کہا ہے کہ صوبہ پنجاب میں رواں سیزن کپاس کی کاشت کا ہدف 35 لاکھ ایکڑ مقرر کیا گیا ہے۔ہفتہ کو کپاس کی صورتحال کے سلسلہ میں ایگریکلچر ہاؤس میں منعقدہ اعلیٰ سطحی جائزہ اجلاس کی صدارت کرتے ہوئے انہوں نے کہا کہ کپاس کی کاشت کے ہدف کے حصول کے لئے تمام ممکنہ وسائل و ذرائع بروئے کار لائے جا رہے ہیں، فیلڈ فارمیشنز کو 15 مئی تک سو فیصد ہدف کے حصول کا ٹاسک سونپ دیا گیا ہے، بروقت اور خصوصی مہم کے نتیجہ میں کل ہدف کا 28 فیصد حاصل کر لیا گیا ہے۔

(جاری ہے)

انہوں نے مزید کہا کہ کپاس کی اگیتی کاشت کے نگہداشتی اُمور بارے فنی رہنمائی کا سلسلہ جاری ہے، کپاس کے علاقوں میں نہری پانی کی دستیابی کے لئے عملی اقدامات اٹھائے جا رہے ہیں۔سیکرٹری زراعت پنجاب نے واضح کیا کہ کپاس کی کاشت کے کل ہدف کا 50 فیصد بہاولپور ڈویژن سے حاصل کیا جائے گا، رواں سال کپاس کی کاشت کے رحجانات نہایت حوصلہ افزاء ہیں۔ اجلاس میں ایڈیشنل سیکرٹری زراعت ٹاسک فورس پنجاب محمد شبیر احمد خان،ڈائریکٹر جنرلز زراعت چوہدری عبدالحمید، نوید عصمت کاہلوں،ڈاکٹر عبدالقیوم، کنسلٹنٹ محکمہ زراعت پنجاب ڈاکٹر محمد انجم علی سمیت دیگر اعلیٰ افسران نے شرکت کی۔