حماس کے ہاتھوں فوجی کی ہلاکت، اسرائیل نے تفصیل جاری کردی

ہلاک ہونے والے فوجی کی شناخت 35 سالہ وارنٹ آفیسر گیلب سلیمان کے طور پر ہوئی ہے، رپورٹ

اتوار 20 اپریل 2025 11:25

تل ابیب (اُردو پوائنٹ اخبارتازہ ترین - این این آئی۔ 20 اپریل2025ء)اسرائیل نے غزہ میں فلسطینی مزاحمتی تنظیم حماس کے ہاتھوں مرنے والے فوجی کی تصدیق کرتے ہوئے تفصیل جاری کردی۔میڈیارپورٹس کے مطابق اسرائیلی فوج کا کہنا تھا کہ شمالی غزہ میں حماس کے ایک حملے میں ایک اسرائیلی فوجی ہلاک اور 5 دیگر زخمی ہو گئے، جن میں سے 3 کی حالت تشویشناک ہے۔

(جاری ہے)

ہلاک ہونے والے فوجی کی شناخت 35 سالہ وارنٹ آفیسر گیلب سلیمان کے طور پر ہوئی ہے، جو غزہ ڈویژن کے ناردرن بریگیڈ میں کام کرتا تھا۔

یہ واقعہ بیت حانون کے قریب 252 ویں ڈویژن کی کارروائیوں کے دوران پیش آیا، جہاں اسرائیلی فوج کی ایک گاڑی پر دوپہر میں گشت کرنے کے دوران حملہ کیا گیا۔ حماس کے مزاحمت کاروں نے ایک سرنگ سے نکل کر اسرائیلی فوج کی گاڑی پر آر پی جی فائر کیا، اس حملے میں 414ویں کامبیٹ انٹیلیجنس یونٹ کی تین خواتین اہلکار زخمی ہوئیں، جن میں ایک افسر اور ایک فوجی کی حالت نازک ہے۔