Live Updates

آرگینک خوراک ،مصنوعات کی صنعت کے فروغ کیلئے کامیاب ممالک کیساتھ مشترکہ منصوبے شروع کئے جائیں‘ نجم مزاری

شراکت داری پاکستان کوجدید زرعی ٹیکنالوجی، تربیت، سرمایہ کاری ،مارکیٹ تک رسائی فراہم کریگی ‘ انٹر پرینیور ،ریسرچ ادارے کے سربراہ کی گفتگو

اتوار 20 اپریل 2025 13:05

لاہور(اُردو پوائنٹ اخبارتازہ ترین - این این آئی۔ 20 اپریل2025ء)انٹر پینیور ،آرگینیک خوراک اور مصنوعات پر ریسرچ کرنے والے ادارے کے سربراہ نجم مزاری نے کہا ہے کہ حکومت آرگینک خوراک اورمصنوعات کی صنعت کو فروغ دینے کے لیے کامیاب ممالک خصوصاًچین کے ساتھ مشترکہ منصوبوں کا آغاز کرے ،حکومت سرپرستی کرے تو پاکستان اربوں ڈالر کی عالمی آرگینک مارکیٹ میں ایک اہم کھلاڑی کے طور پر ابھر کرسامنے آ سکتا ہے ۔

اپنے بیان میں انہوںنے کہا کہ آرگینک خوراک اور مصنوعات کے منصوبوں کو فروغ دے کر پاکستان اپنی برآمدی فہرست میں اضافے کے ذریعے ملک کے لئے قیمتی زر مبادلہ حاصل کر سکتا ہے ۔حکومت سے اپیل ہے کہ آئندہ مالی سال کے بجٹ میں اس حوالے سے پائلٹ پراجیکٹ کا اعلان اور اس کے لئے باضابطہ بجٹ مختص کرے جس سے نجی شعبہ بھی اس جانب راغب ہوگا۔

(جاری ہے)

انہوںنے کہا کہ مستند رپورٹ کے مطابق چین ،امریکہ ،جرمنی، ہالینڈ، نیوزی لینڈ اور ترکی جیسے ممالک پہلے ہی آرگینک مصنوعات کی پیداوار، تحقیق اور عالمی مارکیٹنگ میں نمایاں مقام رکھتے ہیں۔

ان ممالک سے شراکت داری جدید زرعی ٹیکنالوجی، تربیت، سرمایہ کاری اور مارکیٹ تک رسائی فراہم کرے گی بلکہ ملک میں روزگار کے نئے مواقع بھی پیدا ہوں گے۔انہوںنے کہا کہ اس وقت نجی شعبے میں چھوٹے پیمانے پر سر گرمیاں ہو رہی ہیں تاہم اگر حکومت سرپرستی کرے تو اسے وسیع پیمانے پر فروغ دے کر اسے اربوں ڈالر کے برآمدی شعبے میں تبدیل کیا جا سکتا ہے۔