افریقی ممالک کے وزرا و بزنس کمیونٹی کے اعزاز میں استقبالیہ تقریب،صوبائی وزیر چوہدری شافع حسین کی خصوصی شرکت

لاہور (اُردو پوائنٹ اخبارتازہ ترین - اے پی پی۔ 20 اپریل2025ء) افریقہ ہائوس پاکستان اور وزارت خارجہ کے اشتراک سے افریقی ممالک کے وزرا اور بزنس کمیونٹی کے اعزاز میں پاکستان اسٹیٹ گیسٹ ہائوس میں استقبالیہ کی تقریب منعقد ہوئی جس میں صوبائی وزیر صنعت و تجارت چوہدری شافع حسین نے خصوصی شرکت کی۔چیئرمین افریقہ ہائوس محمد ریحان یونس،ایمبیسڈر حامد اصغر خان،یوگنڈا کے وزیر زراعت مسٹر فریڈریک،افریقی ممالک اور پاکستان کی بزنس کمیونٹی کے حکام نے بھی تقریب میں شرکت کی۔

تقریب میں پاکستان افریقہ فرینڈز شپ کا کیک بھی کاٹا گیا۔صوبائی وزیر چوہدری شافع حسین نے تقریب سے خطاب کرتے ہوئے کہا کہ پاکستان اور افریقی ممالک کے مابین موجود سرمایہ کاری اور تجارتی خلا دور کرنا ہوگا، وقت آگیا ہے کہ پاکستان اور افریقی ممالک کے مابین تجارتی حجم بڑھایا جائے۔

(جاری ہے)

صوبائی وزیر نے کہا کہ پنجاب کے سپیشل اکنامک زونز میں غیر ملکی سرمایہ کاروں کو خصوصی مراعات حاصل ہیں،افریقی ممالک کے سرمایہ کاروں کی پنجاب میں سرمایہ کاری کا خیر مقدم کریں گے۔

انہوں نے کہا کہ وزیر اعلی پنجاب کی ہدایت پر ٹیکسٹائل سیکٹر کے فروغ کیلئے گارمنٹ سٹی بنایا جا رہا ہے جس میں مقامی سرمایہ کاروں کے علاوہ چین اور دیگر غیر ملکی سرمایہ کار ٹیکسٹائل انڈسٹری لگا رہے ہیں، پاکستان اور افریقی ممالک ٹیکسٹائل سیکٹر میں اشتراک کر سکتے ہیں۔ انہوں نے کہا کہ قائد اعظم بزنس پارک شیخوپورہ میں 130ایکڑ رقبے پر فارما سیوٹیکل ویلی بنائی جا رہی ہے، پنجاب کے ٹیکسٹائل،فارماسیوٹیکل،سرجیکل،سپورٹس اور دیگر شعبوں میں سرمایہ کاری کا بڑا پوٹینشل موجود ہے،پاکستان اور پنجاب معدنی وسائل کی دولت سے مالا مال ہے جبکہ مائننگ سیکٹر میں افریقی ممالک کو مہارت حاصل ہےلہذا پاکستان مائننگ کے شعبہ میں افریقی ممالک کی مہارت سے فائدہ اٹھا سکتا ہے۔

چوہدری شافع حسین نے کہا کہ پنجاب میں سازگار ماحول کے باعث غیر ملکی سرمایہ کاری آرہی ہے،چین کی موبائل کمپنی نے انڈسٹریل اسٹیٹ فیصل آباد میں موبائل فون مینوفیکچرنگ کا پلانٹ لگانا شروع کردیا ہے جو 2سال میں پیداوار شروع کر دے گا،اسی طرح سولرپینلز مینوفیکچرنگ اور لیتھیئم بیٹریاں بنانے والی غیر ملکی کمپنیاں بھی پنجاب میں اپنے کارخانے لگائیں گی۔

اس موقع پر یوگنڈا کے وزیر زراعت مسٹر فریڈریک نے یوگنڈا میں سرمایہ کاری کے مواقع سے آگاہ کیا۔ چیئرمین افریقہ ہائوس ریحان یونس نے کہا کہ افریقہ ہائوس پاکستان کی انڈسٹری اور افریقن مارکیٹ کیلئے گیٹ وے کی حیثیت رکھتا ہے۔ایمبیسڈرحامد اصغر خان نے کہا کہ پاکستان اور افریقی ممالک کے مابین تجارتی حجم بڑھانے کیلئے کوشاں ہیں۔ سیکرٹری ٹی ڈیپ شہریار خان،صدرایوان صنعت و تجارت ابوذر شاد اور دیگر نے بھی تقریب سے خطاب کیا۔