پاکستان اورآسٹریلیا کی خواتین بلائنڈ کرکٹ ٹیموں کے درمیان دوسرا ٹی ٹوئنٹی میچ منسوخ

منگل 22 اپریل 2025 14:36

کوئنزلینڈ (اُردو پوائنٹ اخبارتازہ ترین - این این آئی۔ 22 اپریل2025ء)پاکستان اور آسٹریلیا کی خواتین بلائنڈ کرکٹ ٹیموں کے درمیان پانچ میچوں کی سیریز کادوسرا ٹی ٹوئنٹی میچ شدید بارش کے باعث منسوخ کر دیا گیا۔

(جاری ہے)

والی ٹیٹ پارک کوئنز لینڈ آسٹریلیا میں سیریز کے دوسرے میچ میں آسٹریلیا بلائنڈ کرکٹ ٹیم نے ٹاس جیت کر پہلے فیلڈنگ کا فیصلہ کیا اور ہلکی بارش کی وجہ سے تاخیر سے شروع ہونے کے باوجود پاکستان بلائنڈ کرکٹ ٹیم نے اپنی اننگز کا آغاز کیا لیکن قومی ٹیم کوابتدائی مشکلات کا سامنا کرنا پڑ اورصرف 35 رنز پر پانچ وکٹیں گنوا دیں۔

ایشا فیصل نے اس کے بعد 31 گیندوں پر 32 رنز کی ذمہ دارانہ اننگز کھیلی۔پاکستان کی ٹیم نے 15.2 اوورز میں9 وکٹوں کے نقصان پر 116 رنز بنائے تھے کہ بارش شروع ہو گئی جس کی وجہ سے کھیل دوبارہ روک دیا گیا اور مسلسل بارش کی وجہ سے میچ بالآخر منسوخ کر دیا گیا۔ آسٹریلیا کی جانب سے سی ویبیک اور اے ہارٹ نے دو دو جبکہ ایس ہال نے ایک وکٹ حاصل کی۔پاکستان بلائنڈ کرکٹ ٹیم کو پانچ میچوں کی سیریز میں 1-0 کی برتری حاصل ہے۔سیریز کا تیسرا T20 میچ منگل 22 اپریل کو اسی مقام پر کھیلا جائے گا۔