دیسی گائیوں اور غیر ملکی بیف بریڈ کے ملاپ سے فربہ جانور حاصل کئے جا سکتے ہیں ،ایڈیشنل ڈائریکٹر لائیو سٹاک سیالکوٹ

منگل 22 اپریل 2025 18:09

سیالکوٹ (اُردو پوائنٹ اخبارتازہ ترین - اے پی پی۔ 22 اپریل2025ء) محکمہ لائیو سٹاک و ڈیری ڈویلپمنٹ سیالکوٹ کے ایڈیشنل ڈائریکٹرڈاکٹر محمد وسیم نے کہا کہ غیر نسلی اور کم دودھ دینے والی دیسی گائیوں اور غیر ملکی بیف بریڈ کے ملاپ سے زیادہ گوشت والے مخلوط جانور حاصل کئے جا سکتے ہیں اس طرح جہاں ملک کی بڑے گوشت کی ضروریات پوری کی جا سکتی ہیں وہیں اضافی گوشت اور اس سے تیارکردہ دیگر مصنوعات برآمد کرکے قیمتی زر مبادلہ بھی حاصل کیاجاسکتاہے۔

انہوں نے کہاکہ جانوروں کو فربہ کرنا ایک منافع بخش کاروبار کی صورت اختیارکرچکاہے لہٰذا بہتر منصوبہ بندی کر کے زیادہ منافع حاصل کیا جا سکتاہے۔ انہوں نے کہاکہ مویشی پال حضرات معیاری بڑاگوشت حاصل کرنے کیلئے 9سے 15 ماہ کے کسی بھی نسل کے کٹڑے، بچھڑے اور معیاری چھوٹا گوشت حاصل کرنے کےلئے 6سے12ماہ کے کسی بھی نسل کے بکرے، چھترے، دنبے کو 3سے 4ماہ تک ماہرین لائیو سٹاک کی مشاورت سے متوازن خوراک کھلا کر فربہ و گوشت کا حصول ممکن بنا سکتے ہیں۔

(جاری ہے)

انہوں نے بتایاکہ غیر پیداوار ی بیل، گائے، بھینس بھی اس کاروبار کیلئے نہایت موزوں ہے۔ انہوں نے کہاکہ مویشی پال حضرات جانوروں ومویشیوں کو مختلف بیماریوں خصوصاً منہ کھر، گل گھوٹو، انٹیرو ٹا کسیمیا سے بچانے کےلئے ویٹرنری ہسپتال سے بروقت حفاظتی ٹیکے لگوائیں۔ مزید رہنمائی یا معلومات اور مشاورت کیلئے مویشی پال حضرات محکمہ لائیوسٹاک کی فری ہیلپ لائن سے بھی رابطہ کر سکتے ہیں۔

Facebook Twitter Google + Share on Whatsapp

دیسی گائیوں اور غیر ملکی بیف بریڈ کے ملاپ سے فربہ جانور حاصل کئے جا سکتے ہیں ،ایڈیشنل ڈائریکٹر لائیو سٹاک سیالکوٹ

متعلقہ عنوان :

مزید زراعت کی خبریں