برآمدات پرمبنی معیشت کی جانب پیشرفت کیلئے آئندہ بجٹ میں عملی اقدامات نظر آنے چاہئیں ‘ پیاف

منگل 22 اپریل 2025 20:03

لاہور (اُردو پوائنٹ اخبارتازہ ترین - آن لائن۔ 22 اپریل2025ء) پیاف کے پیٹرن انچیف میاں سہیل نثار ،چیئرمین سید محمود غزنوی ،سینئر وائس چیئرمین مدثر مسعود چودھری اوروائس چیئرمین راجہ وسیم حسن نے کہا ہے کہ برآمدات پر مبنی معیشت کی جانب پیشرفت کے لئے آئندہ مالی کے بجٹ میں عملی اقدامات نظر آنے چاہئیں ، اوورسیز پاکستانیوںکومختلف مراعاتی اقدامات کے ذریعے حکومتی سطح پر تحسین پیش کرنے کیلئے اقدامات خوش آئند ہیں اوراس پالیسی کا تسلسل جاری رہنا چاہیے ۔

اپنے مشترکہ بیان میں پیاف کے عہدیداروں نے کہا کہ حکومت کو برآمدات کے نعرے کو ایک سنجیدہ، طویل المدتی صنعتی حکمت عملی میں تبدیل کرنا ہوگا، جو قیمت کے اضافے کو ترجیح دے، نجی شعبے کی حمایت کرے اور مختلف شعبوں اور علاقوں میں نئی برآمدی طاقتوں کو فروغ دے۔

(جاری ہے)

انہوں نے کہا کہ برآمدات کے فروغ کے لئے چھوٹی انڈسٹری کو بھی سہولتیں دی جائیں ، ہمارے ہمسایہ ممالک ہینڈ ی کرافٹ سمیت چھوٹی مصنوعات کی اربوں ڈالر کی برآمدات کر رہے ہیں ۔

انہوں نے مزید کہا کہ بیرون ممالک سفارتخانوں میں کمرشل قونصلرز کی تعیناتی کے معاملے میں پالیسی میں تبدیلی لائی جائے،متعلقہ کیڈر کے افسران کو تعیناتیاں دی جائیں اور انہیں برآمدات کے فروغ کے لئے ٹاسک سونپا جائے ۔ انہوں نے مزید کہاکہ اوورسیز پاکستانیوں کا پاکستان کی معیشت کو مضبوط بنیاد فراہم کرنے کلیدی کردار ہے جس پر انہیں خراج تحسین پیش کرتے ہیں ،حکومت کی جانب سے اوورسیز پاکستانیوں کے لئے جو اقدامات اٹھائے جارہے ہیں وہ خوش آئند ہے اس لئے اس پالیسی کا تسلسل جاری رہنا چاہیے ۔