آنجہانی پوپ فرانسس نے کئی دستاویزی فلموں میں اداکاری کے جوہر دکھائے

منگل 22 اپریل 2025 23:13

ویٹی کن (اُردو پوائنٹ اخبارتازہ ترین - این این آئی۔ 22 اپریل2025ء)کیتھولک عیسائیوں کے روحانی پیشوا پوپ فرانسس کا دور ویٹیکن سٹی کی تاریخ میں سب سے زیادہ ترقی پسند روحانی پیشوائوں میں سے ایک کے طور پر پہچانا جاتا ہے۔پوپ فرانسس ہمیشہ سے سنیماء کے فن سے لگائو رکھتے تھے، ان کا خیال تھا سنیما کے پاس یہ طاقت ہے کہ وہ خوف، تجسس، دلچسپی اور حیرت کے احساس کو جگاتا ہے۔

پہلے لاطینی امریکی مسیحی پیشوا پوپ فرانسس کو سنیماء سے صرف دیکھنے کی حد تک لگائو نہیں تھا بلکہ متعدد مواقع پر وہ اسکرین پر بھی جلوہ گر ہو چکے ہیں۔پوپ فرانسس سنیماء کی طاقت پر اس قدر یقین رکھتے تھے کہ انہوں نے تخلیقی آزادی کی خاطر کبھی بھی سنیما میں اپنی نمائندگی یا تشبیہ پر اعتراض نہیں کیا۔اس کے علاوہ کاری گریسیلا روڈریگوز گیلیو اور چارلی مینارڈی کی ہدایت کاری میں بننے والی فلم بیونڈ دی سن جسے 2018 میں ریلیز کیا گیا تھا، سے پوپ فرانسس نے سنیما کی دنیا میں ڈیبیو کیا تھا۔

(جاری ہے)

اس فلم میں پوپ نے 6منٹ کا کیمیو دیا، جس میں وہ خود بچوں کیساتھ کھیلتے اور انہیں مذہب کی تعلیم دیتے دکھائی دیئے۔2018 میں ہی پوپ فرانسس ایک دستاویزی فلم پوپ فرانسس اپنے وعدے کا پکا میں بھی دکھائی دیئے، اس دستاویزی فلم کا پریمیئر اتفاقا اسی سال کانز فلم فیسٹیول میں ہوا تھا۔2021ء میں ایک دستاویزی فلم فرانسسکو میں بھی پوپ کو دکھایا گیا اس فلم میں بھی انہوں نے روحانی پیشوا کا کردار نبھایا، اس فلم میں موسمیاتی تبدیلی، تارکین وطن کے مسائل، دنیا میں امن و امان کی صورتِ حال، سماجی مسائل، خاص طور پر بے گھر اور ستائے ہوئے لوگوں کے حوالے سے بیانات کو نمایاں کیا گیا ہے۔2023 میں اطالوی فلم ان ویاگو میں بھی پوپ فرانسس سکرین پر جلوہ گر ہوئے۔