پی آئی اے کی نجکاری، حکومت کا 24اپریل کو ایک بار پھر درخواستیں طلب کرنے کا فیصلہ

صرف سنجیدہ سرمایہ کاروں کو شامل کرنے کیلئے پری کوالیفکیشن کے معیار سخت کر دیئے گئے

منگل 22 اپریل 2025 21:45

اسلام آباد(اُردو پوائنٹ اخبارتازہ ترین - این این آئی۔ 22 اپریل2025ء)حکومت نے پی آئی اے کی نجکاری کیلئے ایک بار پھر اظہار دلچسپی کی درخواستیں 24اپریل کو طلب کرنے کا فیصلہ کیا ہے اور ملکی و غیر ملکی سرمایہ کاروں کو کم از کم ایک ماہ کی مہلت دی جائے گی۔نجکاری کمیشن نے بتایا کہ اس عمل میں صرف سنجیدہ سرمایہ کاروں کو شامل کرنے کیلئے پری کوالیفکیشن کے معیار سخت کر دیے گئے ہیں۔

جاری بیان میں کہا گیا ہے کہ نجکاری کیلئے پی آئی اے کے 51فیصد سے 10فیصد تک شیئرز فروخت کئے جائیں گے، نجکاری عمل میں ملازمین کا تحفظ اور سروس اسٹرکچر برقرار رکھا جائے گا۔اس ضمن میں کہا گیا کہ پی آئی اے کے اثاثوں اور مالی حیثیت کا جائزہ جولائی تک مکمل کرلیا جائے گا، درخواستوں کی جانچ پڑتال ستمبر 2025ء تک اور نجکاری کا عمل دسمبر 2025ء تک مکمل کرنے کی منصوبہ بندی کی گئی ہے۔

(جاری ہے)

نجکاری کمیشن حکام کے مطابق پری کوالیفکیشن میں سرمایہ کار کمپنیوں کو ملٹی ایئر ریونیو کی شرط پوری کرنا ہوگی، یورپ کے لیے پروازوں کی بحالی کے بعد پی آئی اے سرمایہ کاروں کے لیے مزید پرکشش بن چکی ہے اور خلیجی ریاستوں اور ترک ایئر لائن سمیت متعدد اداروں کی جانب سے دلچسپی متوقع ہے۔حکام کے مطابق اس بار کلین پی آئی اے کا ماڈل اپنایا گیا ہے ،حکومت پہلے ہی پی آئی اے کا قرضہ اپنے ذمہ لے چکی ہے، وفاقی کابینہ نجکاری کمیشن کی سفارش پر نج کاری کی منظوری دے چکی ہے۔