پاک بھارت جنگی کشیدگی، ضلعی انتظامیہ سیالکوٹ کا موک ڈرل کا انعقاد

سائرن بجا کرلوگوں کو حفاظتی تدابیر پر عمل کرانے کی مشق کی گئی، حالیہ کشیدہ صورتحال میں حفاظتی تدابیرپر عمل کرنا ہم سب کی ذمہ داری ہے۔ ڈپٹی کمشنرسیالکوٹ صباعلی اصغر

ثنااللہ ناگرہ جمعہ 9 مئی 2025 20:37

پاک بھارت جنگی کشیدگی، ضلعی انتظامیہ سیالکوٹ کا موک ڈرل کا انعقاد

سیالکوٹ ( اردوپوائنٹ اخبار تازہ ترین۔ آئی پی اے ۔ 09 مئی 2025ء ) پاک بھارت حالیہ جنگی کشیدگی کے حوالے سے ضلعی انتظامیہ سیالکوٹ نے موک ڈرل کا انعقاد کیا، سائرن بجاکرلوگوں کو حفاظتی تدابیر پر عمل کرانے کی مشق کی گئی۔ تفصیلات کے مطابق ڈی سی سیالکوٹ صبا علی اصغر نے اپنے پیغام میں کہا کہ ایمرجنسی صورتحال میں لوگوں کو تربیت دینے کیلئے موک ڈرل کرائی گئی۔

سیالکوٹ میں کل رات صورتحال بالکل ٹھیک رہی، اب بھی ساری صورتحال معمول کے مطابق ہے۔لیکن اس کے باوجود موجودہ جنگی اور کشیدہ صورتحال میں ہمیں اپنے لوگوں کو تربیت دینی ہے تاکہ وہ کسی بھی ہنگامی صورتحال سے نمٹنے کیلئے پہلے سے تیار ہوں۔ سیالکوٹ میں 5مقامات پر موک ڈرل کرائی گئی۔موک ڈرل کے دوران ساڑھے 7بجے سائرن بجائے گئے ۔

(جاری ہے)

موک ڈرل سے قبل ڈی سی سیالکوٹ صبا علی اصغر نے اپنے پیغام میں کہاکہ موک ڈرل کے موقع پر جب سائرن بجے تو گھر کی ساری لائٹیں بند کردینی ہیں، کھڑکیوں اور دروازوں سے دور رہیں گے، دیوار کے ساتھ یا گھر میں اگر بیسمنٹ ہے تو وہاں شیلٹر لے سکتا ہے۔

ایسی صورتحال میں حفاظتی تدابیر اختیار کرنے کی ہم سب پر ذمہ داری عائد ہوتی ہے۔لہذا عوام سے اپیل ہے کہ اس موک ڈرل کو ضرور فالو کریں، یہ آپ لوگوں کی اپنی سیفٹی کیلئے ہے۔ مزید برآں ریسکیو 1122مہمند کی جانب سے بھی جنگی صورتحال سے نمٹنے کیلئے موک ایکسر سائز کا انعقاد کیا گیا ۔ گورنمنٹ ہائی سیکنڈری سکول غلنئی میں ڈسٹرکٹ ایمرجنسی آفیسر انجینئر خالق داد کی سربراہی میں ہونیوالی موک ایکسرسائز میں ریسکیو اہلکاروں کے ساتھ سول ڈیفنس کے رضاکار، اساتذہ،طلبا اور لوکل کمیونٹی نے بھرپور شرکت کی ۔

ایکسرسائز کا مقصد پاکستان اور بھارت کے درمیان حالیہ کشیدہ حالات کے تناظر میں جنگی صورتحال سے موثر انداز میں نمٹنے کی تیاری کرنا تھا۔اس دوران مختلف ایمرجنسی صورتحال جیسے زخمیوں کو ریسکیو کرنا،ابتدائی طبی امداد فراہم کرنا،آگ بجھانا،اور عوام کا محفوظ انخلاکا عملی مظاہرہ کیا گیا۔یہ تربیتی مشق نہ صرف عملی مہارتوں کو نکھارنے کا ذریعہ بنی، بلکہ عوامی شعور اجاگر کرنے میں بھی اہم کردار ادا کیا۔

اس موقع پر افواجِ پاکستان کو خراجِ تحسین پیش کیا گیا اور شرکا نے پاکستان زندہ باد کے فلک شگاف نعرے لگائے۔ڈسٹرکٹ ایمرجنسی آفیسر انجینئر خالق داد نے کہا کہ ریسکیو 1122کے بہادر جوان ہر قسم کے خطرات میں افواج پاکستان کے شانہ بشانہ کھڑے ہوں گے، چاہے وہ قدرتی آفت ہو یا جنگی صورتحال، ہم7 /24عوام کی خدمت کیلئے تیار ہیں اور کسی بھی قیمت پر انسانی جانوں کا تحفظ یقینی بنائیں گے۔