چین کے صوبہ شان دونگ کے شہر چھو فومیں چوتھا عالمی میڈیا انوویشن فورم منعقد

ہفتہ 26 اپریل 2025 15:40

بیجنگ (اُردو پوائنٹ اخبارتازہ ترین - اے پی پی۔ 26 اپریل2025ء) چوتھا عالمی میڈیا انوویشن فورم چائنا میڈیا گروپ اور چین کے صوبہ شان ڈونگ پیپلز گورنمنٹ کے باہمی تعاون سے شان دونگ کے تاریخی شہر چھو فو میں منعقد ہوا۔ تقریب میں 95 ممالک اور خطوں کی بین الاقوامی تنظیموں، میڈیا اداروں، چینی اور غیرملکی تھنک ٹینکس اور ملٹی نیشنل کمپنیوں سمیت مختلف شعبوں کے تقریباً 300 نمائندوں نے آن لائن اور براہ راست شرکت کی۔

چینی میڈیا کے مطابق شان دونگ کے صوبائی پارٹی سیکرٹری لِین وُو نے کہا کہ صوبہ شان دونگ اس فورم کے ذریعے میڈیا کے دوستوں کے ساتھ مل کر گلوبل ڈویلپمنٹ انیشی ایٹو، گلوبل سکیورٹی انیشی ایٹو اور گلوبل سولائزیشن انیشی ایٹو پر عمل درآمد کرنے اور میڈیا کے مکمل ڈھانچے کی تعمیر کو تیز کرنا چاہتا ہے۔

(جاری ہے)

سی پی سی سینٹرل کمیٹی کے شعبہ تشہیر کے نائب سربراہ اور چائنا میڈیا گروپ کے صدر شن ہائی شیونگ نے کہا کہ چائنا میڈیا گروپ میڈیا نشریات کے ذریعے مکالمے کا پل تعمیر کرنے پر کاربند ہے اور مختلف ممالک کے ساتھ مل کر عالمی امن و ترقی کے لیے تہذیبی قوت فراہم کرتا رہے گا۔

فورم کے موقع پر خصوصی مہمانوں نے "چین میں غیر مادی ثقافتی ورثہ " 2025 کی عالمی نمائشوں کا آغاز کیا۔فورم کے دوران " چینی جدت طرازی غیر ملکی نوجوانوں کی نظر میں" سمیت چھ ذیلی فورمز بھی منعقد ہوں گے۔شرکا میڈیا کے ذریعے تہذیبی تبادلوں کے فروغ، انسانی ترقی کے لیے مصنوعی ذہانت کے استعمال اور بین الثقافتی تعاون کو فروغ دینے کے موضوعات پر تفصیلی تبادلہ خیال بھی کریں گے۔