معلومات نہ ہونے کی وجہ سے نوجوان تیزی سے سگریٹ نوشی کی طرف راغب ہورہے ہیں ، مقررین

حیدرآباد (اُردو پوائنٹ اخبارتازہ ترین - اے پی پی۔ 28 اپریل2025ء) آلٹرنیٹیو ریسرچ انیشیٹیو(آے آر آئی) کی جانب سے ''سگریٹ نوشی صحت کیلئے مضر ہے" کے موضوع پر ہیومن رائٹس کمیشن آف پاکستان حیدرآباد کے آفس میں ایک پروگرام کا انعقاد کیا گیا۔ شرکاء نے نوجوانوں میں سگریٹ نوشی کے بڑھتے ہوئے رجحان پر تشویش کااظہار کرتے ہوئے کہاکہ معلومات نہ ہونے کی وجہ سے نوجوان تیزی سے سگریٹ نوشی کی طرف راغب ہورہے ہیں ، ضرورت اس امرکی ہے کہ سگریٹ نوشی کو ترک کرنے کے حوالے سے خصوصی پروگرام منعقد کئے جائیں ، اس پروگرام سے نوجوان کو شعور حاصل ہوگا ،سگریٹ نوشی کی طرف راغب ہونے سے بچیں اور اس کو ترک کرنے کیلئے کوششیں کریں۔

اس موقع پر اے آر آئی کے رومس بھٹی نے اپنے خطاب میں کہا کہ حیدرآباد میں ہم نے اسموکر کے ساتھ کئی پروگرام کئے جس میں ان کو سگریٹ نوشی کے نقصان سے متعلق آگاہ کرتے رہے ہیں اور متعدد نوجوانوں نے سگریٹ نوشی ترک کرکے ثابت کردیا ہے کہ وہ اس مضرصحت اور نقصان دہ اشیاء کو ترک کرنے میں کوئی عار محسوس نہیں کرتے۔

(جاری ہے)

انہوں نے کہاکہ سگریٹ اچھی چیز نہیں ہے لیکن آج کا نوجوان جوکہ 18سال کی عمر کے ہیں وہ سگریٹ کے بہت قریب ہیں اور آج کل مختلف ذائقے کے حساب سے سگریٹ خریدنے پر مجبور ہیں لیکن ان کو پتہ نہیں ہے کہ یہ ذائقہ والے سگریٹ عام سگریٹ سے 200گنا زیادہ نقصان دہ ہے ۔

ٹرانسجینڈر رہنما علی شاہ نے کہاکہ سگریٹ سے نہ صرف کینسر بلکہ ٹی بی سمیت دیگر موذی بیماریاں بھی جنم لیتی ہیں ، حکومت کو چاہیئے کے سگریٹ نوشی کو ترک کرنے کیلئے موثر اقدامات کرے ۔ محکمہ انوائرمینٹل پروٹیکسیشن ایجنسی کے فیلڈ آفیسر نوراحمد ناہیوں نے کہاکہ تمباکو نوشی انسانی صحت اور ماحول دونوں پر اہم منفی اثرات مرتب کرتی ہے۔تمباکو کی کاشتکاری کے لیے بڑی مقدار میں زمین کی ضرورت ہوتی ہے، جس سے جنگلات کی کٹائی ہوتی ہے۔

تمباکو کی کاشتکاری کیڑے مار ادویات، جڑی بوٹی مار ادویات اور کھادوں پر انحصار کرتی ہے، جو مٹی اور پانی کو آلودہ کرتے ہیں۔ سگریٹ کی پیداوار زہریلے کیمیکلز (مثلا نکوٹین، آرسینک، سیسہ)کو ماحول میں خارج کرتی ہے۔سگریٹ کا دھواں کاربن ڈائی آکسائیڈ، میتھین اور دیگر آلودگیوں کو خارج کرتا ہے، جو فضائی آلودگی اور موسمیاتی تبدیلی کا سبب بنتا ہے، تمباکو کی کاشت کاری میں پانی کی بہت زیادہ کھپت ہے۔ مقبول کھوکھر نے کہاکہ سگریٹ جس تیزی سے انسان کے پھپھڑوں کو خراب کرتی ہے اس کا اگر انسان کو علم ہوجائے تو وہ زندگی بھر سگریٹ کو ہاتھ نہیں لگائے گا ۔