پنجاب بورڈ برائے سرمایہ کاری و تجارت کے بورڈ آف ڈائریکٹرز کے اجلاس میں اہم فیصلے

بدھ 30 اپریل 2025 19:15

لاہور (اُردو پوائنٹ اخبارتازہ ترین - این این آئی۔ 30 اپریل2025ء) پنجاب بورڈ آف انویسٹمنٹ اینڈ ٹریڈ کے بورڈ آف ڈائریکٹرز کا اڑتالیسواں اجلاس چیئرمین محمد منتہیٰ اشرف کی زیر صدارت منعقد ہوا جس میں تمام بورڈ اراکین نے شرکت کی۔ اجلاس میں مختلف انتظامی، پالیسی اور حکمتِ عملی کے پہلوؤں پر غور کیا گیا جن کا مقصد ادارے کی کارکردگی کو بہتر بنانا اور سرمایہ کاروں کو سہولیات فراہم کرنے کے نظام کو مزید مؤثر بنانا تھا۔

اجلاس کے دوران گزشتہ اجلاس کی کاروائی کی توثیق کی گئی، مختلف بورڈ کمیٹیوں کی رپورٹس پیش کی گئیں، اور ادارے کے چیف ایگزیکٹو آفیسر کی گزشتہ تین ماہ کی کارکردگی کا تفصیلی جائزہ لیا گیا۔ اس کے علاوہ موجودہ مالی سال کے کاروباری منصوبے کا وسط سالی تجزیہ بھی پیش کیا گیا، جس میں مقررہ اہداف کے حصول اور درپیش چیلنجز پر تفصیلی گفتگو ہوئی۔

(جاری ہے)

ایک اہم پیش رفت یہ رہی کہ بورڈ نے متفقہ طور پر فیصلہ کیا کہ موجودہ چیف ایگزیکٹو آفیسر کی متوقع ریٹائرمنٹ کے پیش نظر نئی تقرری کا عمل فوری طور پر شروع کیا جائے تاکہ قیادت کی منتقلی بروقت، شفاف اور ادارے کی حکمتِ عملی سے ہم آہنگ انداز میں مکمل ہو سکے۔ شفافیت کے فروغ اور سرمایہ کاروں کے لیے مؤثر پالیسی سازی کو سراہتے ہوئے کہا کہ حکومت پنجاب اس ادارے کو ایک فعال، جدید اور سرمایہ کار دوست ادارہ بنانے کے لیے ہر ممکن تعاون جاری رکھے گی۔ اجلاس کے اختتام پر چیئرمین نے تمام اراکین کا شکریہ ادا کیا جنہوں نے نہ صرف بھرپور شرکت کی بلکہ قیمتی مشوروں اور تجاویز سے اجلاس کو مؤثر اور نتیجہ خیز بنایا۔