ماہرین کی گلاب کے پودوں کو گرمی اور مختلف کیڑوں کے حملے سے بچانے کیلئے 4 سے 5روز کے وقفہ کے بعد پانی کی پھوار کا سپرے کرنے کی ہدایت

منگل 13 مئی 2025 15:29

فیصل آباد (اُردو پوائنٹ اخبارتازہ ترین - اے پی پی۔ 13 مئی2025ء) شعبہ ہارٹیکلچر وفلوریکلچر جامعہ زرعیہ کے ماہرین گلبانی و چمن آرائی نے پھولوں کے کاشتکاروں کو ہدایت کی کہ گلاب کے پودوں کو گرمی اور مختلف کیڑوں کے حملے سے بچانے کیلئے 4 سے 5روز کے وقفہ کے بعد پانی کی پھوار کا سپرے کیا جا ئے جبکہ اس کے علاوہ گلاب کے پودوں پر ماہ جون کے دوران جوؤں کا حملہ روکنے کیلئے پیشگی حفاظتی اقدامات پر سختی سے عملدرآمد کی بھی ضرورت ہے۔

(جاری ہے)

انہوں نے بتا یا کہ ماہ جون و جولائی کے دوران موسم گرما کا درجہ حرارت بڑھنے سے گلاب کے پودوں پر جوؤں کے حملے کا خدشہ رہتا ہے جس سے پھولوں کی نشو ونما رک جاتی ہے۔انہوں نے کہا کہ جوؤں کے حملے سے بچاؤ کیلئے ضروری ہے کہ گلاب کے پودوں اور پھولوں پر 4سے 5روز کے وقفہ کے بعد پانی کی پھوار کا سپرے کیا جائے۔انہوں نے بتا یاکہ اگر اس دوران کچھ پھول یا شاخیں خشک ہو جائیں تو انہیں کاٹ دینا چاہیے۔انہوں نے کہا کہ 7دن کے وقفہ سے آبپاشی کا سلسلہ جاری رکھنے کے مفید اثرات مرتب ہو سکتے ہیں۔ انہوں نے مزید بتایا کہ وتر آنے پر گوڈی کا سلسلہ جاری رکھنا چاہیے اور اگر اس دوران فصل میں کوئی جڑی بوٹیاں نظر آئیں تو انہیں بھی نکا ل باہر کرنا چاہیے تاکہ دیگر پودے متاثر نہ ہو سکیں۔