نیدرلینڈزکےکیسپر وین اڈن نے گیرو ڈی اٹالیہ سائیکل ریس کا چوتھا مرحلہ جیت لیا

بدھ 14 مئی 2025 08:50

روم (اُردو پوائنٹ اخبارتازہ ترین - اے پی پی۔ 14 مئی2025ء) نیدرلینڈز کے سائیکلسٹ کیسپر وین اڈن نے گیرو ڈی اٹالیہ سائیکل ریس کا چوتھا مرحلہ جیت لیا۔ البانیہ سے گیرو ڈی اٹالیہ کا 108 واں ایڈیشن شروع ہوچکا ہے جس میں سائیکلنگ کی دنیا کے نامور سائیکل سوار ٹائٹل کے حصول کے لئے کوشاں ہیں۔ گیرو ڈی اٹالیہ سائیکل ریس کے چوتھے مرحلے میں سائیکل سواروں نے البروبیلو سے لیسی تک کا فاصلہ طے کرنا تھا جو سیدھے راستے پر 189 کلو میٹر پر محیط تھا۔

(جاری ہے)

23سالہ نیدرلینڈز کے سائیکلسٹ کیسپر وین اڈن نے عمدہ سائیکلنگ کا مظاہرہ کرتے ہوئے 189کلومیٹر کا فاصلہ 4گھنٹے 2 منٹ اور 21 سیکنڈز میں طے کرکے چوتھے مرحلے میں پہلی پوزیشن حاصل کی۔ نیدرلینڈز کے ہی سائیکل سوار اولاو کویج نے دوسری جبکہ نیدرلینڈز کے ہی سائیکل سوار میکل زجلارڈنے تیسری پوزیشن حاصل کی۔ گیرو ڈی اٹالیہ ایک گرینڈ ٹور سائیکلنگ سٹیج ریس ہے جو تین ہفتوں میں مکمل ہوگی جس میں دنیا کے نامور سائیکلسٹس شریک ہیں۔ گیرو ڈی اٹالیہ سائیکل ریس 21 مرحلوں پر محیط ہے جس میں سائیکل سوار 3443.3 کلو میٹر کا سفر طے کرینگے۔ گیرو ڈی اٹالیہ سائیکل ریس میں 23 ٹیمیں ٹائٹل کے حصول کے لئے کوشاں ہیں۔ گیرو ڈی اٹالیہ سائیکل ریس 23 روز جاری رہنے کے بعد یکم جون کو اختتام پذیر ہوگی۔\932