قومی کرکٹ ٹیموں شاہینز، ایمرجنگ اور ایج گروپس کے لیے پلان تیار کر لیا گیا

بدھ 14 مئی 2025 20:03

لاہور (اُردو پوائنٹ اخبارتازہ ترین - این این آئی۔ 14 مئی2025ء)قومی کرکٹ ٹیموں شاہینز، ایمرجنگ اور ایج گروپس کے لیے پلان تیار کر لیا گیا۔ذرائع کے مطابق ڈائریکٹر ہائی پرفارمنس عاقب جاوید نے پلان منظوری کیلئے پیش کر دیا۔ اس کے ساتھ ساتھ بائیو مکینکس لیب کو مقامی یونیورسٹی سے نیشنل کرکٹ اکیڈمی لاہور منتقل کرنے کا پلان تیار کیا گیا ۔ذرائع نے بتایا کہ کرکٹرز کو جدید آلات اور سافٹ ویئرز کے ساتھ ٹریننگ دی جائے گی۔

(جاری ہے)

فیصل آباد اور سیالکوٹ کے ہائی پرفارمنس سینٹرز کو آباد کرنے کا منصوبہ بنایا گیا ہے۔سیالکوٹ میں انڈر-13 اور انڈر-15 ایج گروپس کے کھلاڑیوں کے پروگرامز ہوں گے جبکہ فیصل آباد میں انڈر-17 ایج گروپ کے کھلاڑیوں کے طویل ٹریننگ پروگرام ہوں گے۔ذرائع کے مطابق ملتان میں انڈر-19 اور کراچی میں ویمن کرکٹرز کے سینٹرز ہوں گے، نیشنل کرکٹ اکیڈمی میں 30 سے 35 کرکٹرز کی ٹریننگ قومی ٹیم کی بینچ اسٹرنتھ کیلئے ہوگی۔ٹیسٹ سیریز کی ابھی سے تیاری کیلئے بھی پلان تیار کر لیا گیا، ریڈ بال کے لیے فوری طور پر ہیڈ کوچ مقرر نہیں کیا جا رہا تاہم مصباح الحق سمیت کئی نام زیرِ غور ہیں۔