آسٹریلیا کے سائیکلسٹ کیڈن گرووزنے گیرو ڈی اٹالیہ سائیکل ریس کا چھٹا مرحلہ جیت لیا

جمعہ 16 مئی 2025 08:40

روم (اُردو پوائنٹ اخبارتازہ ترین - اے پی پی۔ 16 مئی2025ء) آسٹریلیا کے سائیکلسٹ کیڈن گرووزنے گیرو ڈی اٹالیہ سائیکل ریس کا چھٹا مرحلہ جیت لیا۔ 26 سالہ کیڈن گرووز کی یہ گیروڈی اٹالیہ ریس میں پہلی سٹیج فتح ہے۔ البانیہ سے گیرو ڈی اٹالیہ کا 108 واں ایڈیشن شروع ہوچکا ہے جس میں سائیکلنگ کی دنیا کے نامور سائیکل سوار ٹائٹل کے حصول کے لئے کوشاں ہیں۔

گیرو ڈی اٹالیہ سائیکل ریس کے چھٹے مرحلے میں سائیکل سواروں نے پوٹینزا سے نیپلز تک کا فاصلہ طے کرنا تھا جو پہاڑی راستے پر 227 کلو میٹر پر محیط تھا۔۔ 26 سالہ آسٹریلین سائیکل سوار کیڈن گرووز نے عمدہ سائیکلنگ کا مظاہرہ کرتے ہوئے 227کلومیٹر کا فاصلہ 4گھنٹے 59 منٹ اور 52 سیکنڈز میں طے کرکے چھٹے مرحلے میں پہلی پوزیشن حاصل کی۔

(جاری ہے)

24 سالہ بیلجیئم کے سائیکل سوار میلان فریٹن نے دوسری جبکہ 21 سالہ فرانسیسی سائیکل سوار پال میگنیئر نے تیسری پوزیشن حاصل کی۔

ریس میں ڈنمارک کے سائیکلسٹ میڈس پیڈرسن کا پنک جرسی پر قبضہ برقرار ہے ۔گیرو ڈی اٹالیہ ایک گرینڈ ٹور سائیکلنگ سٹیج ریس ہے جو تین ہفتوں میں مکمل ہوگی جس میں دنیا کے نامور سائیکلسٹس شریک ہیں۔ گیرو ڈی اٹالیہ سائیکل ریس 21 مرحلوں پر محیط ہے جس میں سائیکل سوار 3443.3 کلو میٹر کا سفر طے کرینگے۔ گیرو ڈی اٹالیہ سائیکل ریس میں 23 ٹیمیں ٹائٹل کے حصول کے لئے کوشاں ہیں۔ گیرو ڈی اٹالیہ سائیکل ریس 23 روز جاری رہنے کے بعد یکم جون کو اختتام پذیر ہوگی۔\932