Live Updates

پی ایس ایل 10 کے بقیہ میچز کیلئے کئی نئے غیر ملکی کھلاڑی بھی شامل

جمعہ 16 مئی 2025 19:16

اسلام آباد (اُردو پوائنٹ اخبارتازہ ترین - این این آئی۔ 16 مئی2025ء)پاکستان سپر لیگ (پی ایس ایل) کے دسویں ایڈیشن کے ابتدائی راؤنڈ میں ٹورنامنٹ کا حصہ نہ بننے والے کھلاڑیوں نے بھی بقیہ میچز کیلئے پاکستان آنے پر آمادگی ظاہر کردی۔پی ایس ایل 10 کے بقیہ میچز کے لیے غیرملکی کھلاڑیوں نے ٹیموں کو جوائن کر لیا ۔بنگلہ دیشی آل راؤنڈر شکیب الحسن اور راجا پاکسے، سری لنکا کے دنیش چندیمل، اویشکا فرنینڈو، افغانستان کے گلبدین نائب، اسکاٹ لینڈ کے جارج منسے، انگلینڈ کے ایلکس ہیلز، جنوبی افریقی بیٹر رسی وین ڈر ڈیوسن پی ایس ایل 10 کے ابتدائی میچز میں ٹیموں کا حصہ نہیں تھے تاہم ان تمام کھلاڑیوں نے پاکستان سپر لیگ 10 کے بقیہ 8 میچز کے لیے پاکستان آنے کے لیے دستیابی ظاہر کردی اور تمام کھلاڑی 17 مئی سے راولپنڈی میں ایکشن میں ہوں گے۔

(جاری ہے)

خیال رہے کہ پاکستان کرکٹ بورڈ نے پاک بھارت جنگ کے باعث پی ایس ایل غیر معینہ مدت کیلئے ملتوی کردیا تھا اور پی سی بی نے تمام غیر ملکی کھلاڑیوں کو بحفاظت پاکستان سے رخصت کیا تھا۔تاہم اب پی سی بی نے باقی میچز کا شیڈول جاری کردیا جس کے تحت راولپنڈی کرکٹ اسٹیڈیم میں لیگ کے آخری 4 میچز کھیلے جائیں گے ،قذافی اسٹیڈیم لاہور پلے آف مرحلے کی میزبانی کرے گا جس میں فائنل بھی شامل ہے۔

رپورٹ کے مطابق شکیب الحسن اور راجا پاکسے لاہور قلندرز میں شامل ہوگئے ہیں، رائیلی روسوو اور فن ایلن کے علاوہ گلبدین نائب ، دنیش چندیمل اور اویشکا فرنینڈو بھی کوئٹہ گلیڈی ایٹرز سے منسلک ہوگئے ہیں جب کہ جارج منسے کراچی کنگز کے اسکواڈ میں شامل ہوگئے ہیں۔اس سے قبل، الیکس ہیلز، رسی وین ڈر ڈیوسن، ڈیوڈ وارنر ، بین میک ڈرموٹ، جیمز ونس، سکندر رضا، لیوک ووڈ ، ٹام کوہلر کیڈ مور، میکس برائنٹ، نجیب اللہ زدران، کوشل مینڈس بھی پی ایس ایل کے بقیہ میچز کے لیے پاکستان آنے کی ہامی بھرچکے ہیں۔دوسری جانب، نیوزی لینڈ کے کھلاڑیوں کو این او سی کے مسائل کا سامنا ہے تاہم پی سی بی کے کیوی بورڈ اور پلیئرز سے مذاکرات جاری ہیں۔