امریکا سے مذاکرات سانپ سیڑھی کا کھیل، وہ ہربار اپنا موقف تبدیل کرلیتا ہے، ایران

منگل 20 مئی 2025 14:21

تہران (اُردو پوائنٹ اخبارتازہ ترین - اے پی پی۔ 20 مئی2025ء) ایران نے بالواسطہ جوہری مذاکرات میں امریکا کے بدلتے موقف کو ’’سانپ سیڑھی‘‘کے کھیل سے تشبیہ دیتے ہوئے کہا ہے کہ وہ ہربار اپنا موقف تبدیل کرلیتا ہے۔ العربیہ اردو نے ایرانی وزارت خارجہ کے ترجمان اسماعیل بغائی کی ہفتہ وار پریس کانفرنس کے حوالے سے بتایا کہ ہر مرتبہ جب ہم مذاکراتی نشست کرتے ہیں اور محسوس کرتے ہیں کہ ہم نے پیش رفت کی ہے اور ایک دوسرے کے خیالات کو سمجھنا شروع کر دیا ہے تو امریکا افسوس کے ساتھ واپس چلا جاتا ہے اور بالکل مختلف موقف اختیار کر لیتا ہے۔

انہوں نے کہا کہ امریکی موقف میں یہ مسلسل تبدیلی یقین کو کمزور کرتی ہے اور کسی بھی مذاکراتی عمل کو ایک مشکل کام بنا دیتی ہے۔ انہوں نے کہا کہ یہ اقدامات مذاکراتی عمل میں مقابل فریق کی سنجیدگی کے بارے میں شکوک و شبہات پیدا کر رہے ہیں۔

(جاری ہے)

انہوں نے زور دیا کہ ایران سفارتی عمل میں تسلیم شدہ قواعد کا پابند ہے اور اس نے امریکا کے موقف میں تبدیلی کو مذاکرات کی مشکلات میں سے ایک قرار دیا ہے،امریکا کے بدلتے موقف سانپ سیڑھی کے کھیل کی طرح ہیں۔

پابندیوں کے حوالے سے انہوں نے کہا کہ ایک ایسے وقت میں پابندیاں عائد کرنا جب امریکی فریق ایران کے ساتھ سفارتی راستے کی تلاش کا دعویٰ کرتا ہے سنجیدگی اور نیک نیتی کی واضح کمی کو ظاہر کر رہا ہے۔ یہ بیانات ایرانی نائب وزیر خارجہ عباس عراقچی کے نائب مجید تخت روانجی کی جانب سے اس بات کی تصدیق کے بعد سامنے آئے ہیں کہ اگر امریکا نے مکمل طور پر افزودگی روکنے پر اصرار کیا تو اس کے ساتھ جوہری مذاکرات ناکام ہو جائیں گے۔

یہ امریکی صدر کے خصوصی ایلچی سٹیو وٹکوف کی جانب سے کل اس بات کی تصدیق کے بعد بھی سامنے آیا کہ واشنگٹن تہران کو اپنی یورینیم افزودگی کی صلاحیت کا ایک فیصد بھی رکھنے کی اجازت نہیں دے گا اور وٹکوف نے اسے ایک ریڈ لائن قرار دیا۔ وٹکوف نے کہا کہ کوئی بھی معاہدہ جس میں افزودگی کی ممانعت شامل نہیں اس کی اجازت نہیں دی جا سکتی کیونکہ افزودگی سے جوہری ہتھیار بنانا ممکن ہو جاتا ہے۔ انہوں نے یہ بھی انکشاف کیا کہ ایرانی وفد کے ساتھ نیا اجلاس آئندہ ہفتے یورپ میں ہوگا۔ انہوں نے امید ظاہر کی کہ اس کے مثبت نتائج برآمد ہوں گے۔