ڈپٹی سپیکر خیبر پختونخوا اسمبلی ثریا بی بی کی زیر صدارت استحقاق کمیٹی کا اجلاس

منگل 20 مئی 2025 15:05

ایبٹ آباد (اُردو پوائنٹ اخبارتازہ ترین - اے پی پی۔ 20 مئی2025ء) خیبر پختونخوا اسمبلی کی ڈپٹی سپیکر ثریا بی بی کی زیر صدارت صوبائی اسمبلی کی استحقاق کمیٹی کا اجلاس منعقد ہوا۔ اجلاس میں سابق سپیکر و رکن صوبائی اسمبلی خیبر پختونخوا مشتاق احمد غنی نے بھی شرکت کی۔ خیبر پختونخوا اسمبلی کی استحقاق کمیٹی کا اجلاس ڈپٹی سپیکر ثریا بی بی کی زیر صدارت منعقد ہوا جس استحقاق کی تحریک نمبر6، 9، 14 اور 18 پر غور کیا گیا۔

تحریک نمبر6 اور 9 پر متعلقہ حکام کی عدم حاضری کے باعث بحث نہیں ہو سکی۔ کمیٹی نے اس عدم تعاون پر تشویش کا اظہار کرتے ہوئے متعلقہ افراد کو دوبارہ طلبی کے سمن جاری کئے۔ کمیٹی نے واضح کیا کہ اسمبلی کی کارروائی کا احترام ہر فرد پر لازم ہے۔ تحریک نمبر 14 اور 18 کے حوالہ سے متعلقہ افراد کمیٹی میں پیش ہوئے اور غیر مشروط معافی مانگی۔

(جاری ہے)

ان کے ندامت بھرے رویہ اور آئندہ ایسی کسی خلاف ورزی سے اجتناب کی یقین دہانی پر کمیٹی نے ان کے خلاف کسی تادیبی کارروائی سے گریز کیا تاہم انہیں سختی سے تنبیہ کی گئی کہ آئندہ ایسے رویہ سے اجتناب کیا جائے۔

اجلاس میں صوبائی وزیر قانون آفتاب عالم، وزیراعلیٰ کے معاون خصوصی برائے جنگلات پیر مصور شاہ اور اراکین صوبائی اسمبلی مشتاق احمد غنی، ارباب وسیم، تاج محمد، خالد خان، ثوبیہ شاہد، عبدالسلام آفریدی، منیر لغمانی، عدیل اقبال، اکرام غازی اور رشاد خان نے شرکت کی۔ استحقاق کمیٹی نے اسمبلی کی کارروائی کے تقدس اور نظم و ضبط کو برقرار رکھنے کے عزم کا اعادہ کیا اور واضح کیا کہ ہر فرد اسمبلی اور اس کی کمیٹیوں کے سامنے جواب دہ ہے۔