بیرون ممالک ائیرپورٹس ،سپرسٹورزپر پاکستانی پویلین قائم کئے جائیں ‘ نجم مزاری

ہفتہ 23 اگست 2025 20:56

لاہور (اُردو پوائنٹ اخبارتازہ ترین - آن لائن۔ 23 اگست2025ء) آرگینک خوراک اور مصنوعات پر ریسرچ کرنے والے ادارے کے سربراہ نجم مزاری نے کہا ہے کہ آئندہ 7سے 8سالوں میں 100ارب ڈالر برآمدات کے ہدف کا حصول صرف نعروں اور بیان بازی سے ممکن نہیں ،برآمدات میں اضافے کیلئے اسٹیک ہولڈرز کی مشاورت سے مضبوط سٹرکچر بنانا ہوگا ،برآمدی فہرست میں اضافے کے لئے اس میں آرگینک خوراک اور مصنوعات کو بھی شامل کیا جائے ۔

اپنے بیان میں نجم مزاری نے کہا کہ برآمدات میں اضافے کے لئے مربوط حکمت عملی کے تحت پیشرفت کرنا ہو گی ، صدر ،وزیر اعظم ، وزرائے اعلیٰ اور دیگر اعلیٰ حکومتی شخصیات کے غیر ملکی دوروں میں نجی شعبے خصوصاً برآمد کنندگان کو بھی ہمرا ہ لے جایا جائے ، بیرون ممالک ائیر پورٹس اور سپر سٹورز پر پاکستانی مصنوعات کے پویلین قائم کئے جائیں جہاں پر اعلیٰ معیار کی مصنوعات ڈسپلے کی جائیں ، حکومت برآمدات کرنے والوں کو فریٹ پر خصوصی سبسڈی دے اور دیگر مدوں میں بھی مالی معاونت کی جائے ۔

(جاری ہے)

نجم مزاری نے کہا کہ پاکستان کی آرگینک خوراک اور مصنوعات اعلیٰ معیار کی حامل ہیں ، وسیع پیمانے پر برآمدات کے لئے حکومت لیبارٹریز کے قیام ، لیبلنگ اور سر ٹیفکیشن کے لئے مدد فراہم کرے تاکہ پاکستان کی برآمدی فہرست میں باضابطہ طور پر نئی آئٹمز شامل ہو سکیں جس سے پاکستان کے لئے قیمتی زر مبادلہ کا حصول ممکن ہو سکے گا۔