جولائی میں غیرملکی درآمدات میں 23فیصد اضافہ،حجم 5.86ارب ڈالر رہا

سمارٹ موبائل فونز کی امپورٹ میں 125فیصد سے زیادہ اضافہ ہوا، 14کروڑ 53لاکھ ڈالر کے موبائل درآمد ہوئے غذائی اشیا ء کی درآمدات میں41فیصد اضافہ ، دودھ، کریم، گندم، خشک میوہ جات، چائے، مصالحوں کی درآمد بھی بڑھ گئی

ہفتہ 23 اگست 2025 19:05

جولائی میں غیرملکی درآمدات میں 23فیصد اضافہ،حجم 5.86ارب ڈالر رہا

لاہور(اُردو پوائنٹ اخبارتازہ ترین - این این آئی۔ 23 اگست2025ء) رواں مالی سال کے پہلے مہینے میں غیر ملکی درآمدات میں 23فیصد اضافہ ریکارڈ کیا گیاہے جس کے بعد مجموعی حجم 5ارب 86کروڑ ڈالر رہا، پیٹرولیم مصنوعات اور پام آئل سب سے زیادہ درآمد کی گئیں۔دستاویز کے مطابق پیٹرولیم کی درآمد 6.42فیصد اضافے سے 1.34ارب ڈالر ریکارڈ کی گئیں، اسمارٹ موبائل فونز کی درآمد میں 125فیصد سے زیادہ اضافہ ہوا، جولائی 2025میں 14کروڑ 53لاکھ ڈالر کے موبائل درآمد ہوئے، صرف ایک ماہ میں 41 ارب 38کروڑ روپے کے موبائل منگوائے گئے۔

دستاویز کے مطابق ٹیکسٹائل سیکٹر کی درآمدات میں 21فیصد اضافہ دیکھنے میں آیا اور حجم 59کروڑ ڈالر سے تجاوز کر گیا، ٹرانسپورٹ سیکٹر میں درآمدات 167فیصد اضافے سے 30کروڑ 70لاکھ ڈالر رہیں، گاڑیوں کی درآمد میں 139فیصد اضافہ ہوا ، ماہانہ حجم 3کروڑ 28لاکھ ڈالر رہا، گاڑیوں کی مقامی اسمبلنگ کیلئے پرزوں کی امپورٹ 290فیصد تک بڑھ گئی۔

(جاری ہے)

بسوں، ٹرکوں، ہیوی گاڑیوں، جہازوں کی درآمدات میں بھی اضافہ ہوا، جولائی میں موٹر کارز کے پارٹس کی درآمد 13کروڑ 42لاکھ ڈالر ریکارڈ کی گئی ، غذائی اشیا ء کی درآمدات 41فیصد اضافے سے 74کروڑ 38لاکھ ڈالر رہی ، دودھ، کریم، گندم، خشک میوہ جات، چائے، مصالحوں کی درآمد بھی بڑھ گئی ۔

سویا بین، پام آئل، چینی، دالوں سمیت دیگر اشیا ء کی درآمد میں بھی اضافہ دیکھا گیا، گزشتہ ماہ سب سے زیادہ 30کروڑ 21لاکھ ڈالر مالیت کا پام آئل امپورٹ ہوا، مشینری کی درآمدات میں 29فیصد اضافہ ہوا جس کے بعد حجم 92کروڑ 75 لاکھ ڈالر رہا، زرعی آلات کی درآمد 9.13فیصد اضافے سے 89کروڑ ڈالر رہی، سونے کی درآمد میں 100فیصد کمی ریکارڈ کی گئی۔