انگلینڈ، آسٹریلیا ایشزسیریز کا 74واں ایڈیشن نومبرمیں ہوگا

سیریز کا پہلا میچ انگلینڈ اور آسٹریلیا کی ٹیموں کے درمیان 21 نومبر سے پرتھ سٹیڈیم پرتھ میں شروع ہوگا

ہفتہ 24 مئی 2025 12:22

انگلینڈ، آسٹریلیا ایشزسیریز کا 74واں ایڈیشن نومبرمیں ہوگا

دبئی(اُردو پوائنٹ اخبارتازہ ترین - این این آئی۔ 24 مئی2025ء)انگلینڈ اور آسٹریلیا کی کرکٹ ٹیموں کے درمیان ایشز سیریز کے 74 ویں ایڈیشن کا آغاز رواں سال نومبر میں آسٹریلیا میں ہوگا۔ پانچ ٹیسٹ میچوں پر مشتمل سیریز کا پہلا میچ انگلینڈ اور آسٹریلیا کی ٹیموں کے درمیان 21 نومبر سے پرتھ سٹیڈیم پرتھ میں شروع ہوگا۔پرتھ سٹیڈیم (جسے آپٹس سٹیڈیم بھی کہا جاتا ہی) ایشزسیریز کے پہلے ٹیسٹ کی میزبانی کرے گا۔

یہ پہلا موقع ہوگا جب پرتھ سٹیڈیم ایشز ٹیسٹ کی میزبانی کرے گا اور پرتھ میں ایشز کرکٹ کی واپسی کا نشان بھی ہوگا۔انٹرنیشنل کرکٹ کونسل (آئی سی سی)نے مینز ایشز سیریز کے شیڈول اور وینیوز کا اعلان کر دیا ہے۔آسٹریلیا اور انگلینڈ کے مابین ایشز سیریز 2025/26کا آغاز 21نومبر سے آسٹریلیا میں ہوگا۔

(جاری ہے)

سیریز کا پہلا ٹیسٹ میچ 21 سے 25 نومبر تک پرتھ سٹیڈیم پرتھ میں کھیلا جائے گا۔

دونوں ٹیموں کے درمیان پانچ ٹیسٹ میچز کھیلے جائیں گے۔مینز ایشز سیریز کے شیڈول کے مطابق پانچ ٹیسٹ میچوں کی سیریز کا دوسرا ٹیسٹ 4سے 8دسمبرگابا، برسبین میں کھیلا جائیگا،تیسرا میچ 17 سے 21دسمبرتک ایڈیلیڈ اوول، ایڈیلیڈمیں کھیلا جائے گا،چوتھا باکسنگ ڈے ٹیسٹ میچ 26 سے 30 دسمبر تک میلبورن کرکٹ گرائونڈ، میلبورن(ایم سی جی)میں کھیلا جائے گا جبکہ پانچواں اور آخری ٹیسٹ میچ 4سے 8 جنوری 2026 تک سڈنی کرکٹ گرائونڈ، سڈنی میں کھیلا جائے گا۔

1982/83 کی ایشزسیریز کے بعد یہ آسٹریلیا میں برسبین کرکٹ گراؤنڈ میں شروع ہونے والی پہلی ایشز سیریز بھی ہو گی۔ دونوں ٹیموں کے درمیان 73 ایشز سیریز ہوچکی ہیں جن میں سے 34 میں آسٹریلیا نے فتح حاصل کی جبکہ 32 سیریز انگلینڈ کے نام رہیں۔7 ایشز سیریز بے نتیجہ رہیں۔یہ سیریز مجموعی طور پر 74ویں ایشز سیریز جو آسٹریلیا میں ہوگی۔دونوں ٹیموں کے درمیان گزشتہ ایشز سیریز میں 2-2 سے برابر ہوگئی تھی۔واضح رہے کہ 2025/26 کی ایشز سیریز ورلڈ ٹیسٹ چیمپئن شپ کا حصہ ہوگی۔