پنجاب حکومت خواتین کھلاڑیوں کو آگے بڑھنے کے مساوی مواقع فراہم کررہی ہے‘مریم نوازسے ایتھلیٹ مونا خان کی ملاقات

لاہور(اُردو پوائنٹ اخبارتازہ ترین - این این آئی۔ 24 مئی2025ء) وزیراعلیٰ پنجاب مریم نواز شریف سے ایتھلیٹ،جرنلسٹ مونا خان اور کوچ محمد یوسف نے ملاقات کی۔ ایتھلیٹ مونا خان کو 42.2 کلو میٹر طویل لندن میراتھن 2025 کو مکمل کرنے کا اعزاز حاصل ہے،ایتھلیٹ مونا خان اورکوچ محمد یوسف نے وزیراعلیٰ مریم نوازشریف کو گولڈ میڈل پیش کیا۔وزیراعلی مریم نواز شریف نے ایتھلیٹ مونا خان اور کوچ محمد یوسف کو پانچ،پانچ لاکھ روپے کے چیک دئیے۔

وزیراعلی مریم نواز شریف نے مونا خان کی درخواست پر ٹی شرٹ پر دستخط کئے۔مونا خان نے وزیر اعلیٰ مریم نواز شریف کو سندھ کی اجرک پہنائی اور پنسل سکیچ پیش کیا۔وزیراعلیٰ مریم نوازشریف نے مونا خان اور ان کے کوچ محمد یوسف کو پر مبارکباددی-مونا خان اور محمد یوسف نے وزیر اعلی پنجاب مریم نواز شریف کا شکریہ ادا کیا -وزیراعلی مریم نوازشریف نے اس موقع پر گفتگو کرتے ہوئے کہاکہ پنجاب حکومت خواتین کھلاڑیوں کو آگے بڑھنے کے مساوی مواقع فراہم کررہی ہے۔

(جاری ہے)

پاکستان کے ایتھلیٹس اور کھلاڑی دنیا بھر کے میدانوں میں بہترین کارکردگی کا مظاہرہ کررہے ہیں۔وزیراعلی مریم نوازشریف نے کہاکہ پنجاب میں کھیلوں کے فروغ کے لئے کھیلتا پنجاب پروگرام شروع کیا ہے۔حکومت پنجاب کھیلوں کے فروغ کے لئے ہر ممکن اقدامات کررہی ہے۔ حکومت پنجاب کا اولین مقصد نوجوانوں کو کھیلوں کے میدانوں کی طرف لے کر آنا ہے۔

صوبے میں منعقدہ پہلی پنک گیمز میں 1300 خواتین پلیئرز نے حصہ لیکر ریکارڈ قائم کیا۔ پنک گیمز کی انعامی رقم 50لاکھ روپے سے بڑھا کر ایک کروڑ روپے کر دی ہے۔ خواتین کھلاڑیوں اور ایتھلیٹس کو صلاحیتوں کے اظہار کے لئے موافق ماحول اور سہولیات مہیاکریں گے۔ ایتھلیٹ،جرنلسٹ مونا خان نے کہاکہ پنجاب کی بیٹی نے سندھ کی بیٹی کو بے مثال عزت دی۔سندھ کی بیٹی کو پنجاب بلا کر عزت افزائی کی اورحوصلہ بڑھایا۔

اپنا میڈل وزیراعلی مریم نواز شریف سے منسوب کرتی ہوں۔ مریم نواز شریف بہت اچھی وزیراعلی تو ہیں ہی، شاندار خاتون بھی ہیں۔ خواتین کو روتے روتے دیکھایا جاتا ہے یہ حقیقت نہیں،پاکستانی خواتین بہت بہادر ہیں۔مونا خان نے کہاکہ مریم نوازشریف کی وجہ سے پازیٹو انرجی ملی اوراسی جذبے کے تحت اعزاز حاصل کیا۔پنجاب کے عوام سے ہمیشہ وزیراعلیٰ مریم نوازشریف کے بارے میں تعریف سنی۔

پنجاب سمیت دیگر صوبوں کے طلبہ کو سکالر شپ اورلیپ ٹاپ وزیراعلیٰ مریم نوازشریف کا احسن اقدام ہے۔عالمی سطح پر جب بھی اعزاز حاصل کروں گی تو پاکستان اورپاکستان کی بیٹی مریم نوازشریف کا نام بھی آئے گا۔ کوچ محمد یوسف نے کہاکہ لاہور بلا کر حوصلہ افزائی کرنے پر وزیراعلی مریم نواز شریف کا شکریہ ادا کرتے ہیں۔سینئر صوبائی وزیرمریم اورنگزیب، چیف سیکرٹری زاہد اختر زمان اور سیکرٹری سپورٹس مظفر خان سیال بھی موجود تھے۔