ٴْریڑھی لگانے کے تنازع پر دکاندار نے ریڑھی بان کو مبینہ طور پر تشدد اور دھکا دیکر مار ڈالا

اتوار 25 مئی 2025 18:05

b فیصل آباد (اُردو پوائنٹ اخبارتازہ ترین - آن لائن۔ 25 مئی2025ء)سول ہسپتال کے باہر دکان کے سامنے ریڑھی لگانے کے تنازع پر دکاندار نے ریڑھی بان کو مبینہ طور پر تشدد اور دھکا دیکر مار ڈالا‘ متوفی کے لواحقین سراپا احتجاج‘ پولیس نے نعش تحویل میں لیکر تفتیش شروع کر دی۔

(جاری ہے)

آن لائن کو ملنے والی اطلاعات کے مطابق گلشن حرم کالونی گلی نمبر3 پل عبدالله سمندری روڈ کے رہائشی محمد رمضان نے پولیس کو دی جانے والی درخواست میں بتایا کہ اس کا بیٹا عدنان تقریباً 15سال سے سول ہسپتال کے باہر میڈی کیئر ہسپتال کے سامنے ریڑھی لگا کر اپنے بچوں کا پیٹ پالتا ہے گزشتہ دوپہر وہ ریڑھی لگانے لگا تو دکاندار ماجد نے اپنے دیگر ساتھیوں کے ہمراہ اسکو گالم گلوچ کرتے ہوئے تشدد کا نشانہ بنایا اور ہاتھا پائی کے دوران دھکا لگنے سے عدنان گر پڑا اور بے ہوش ہو گیا، جسے تشویشناک حالت میں سول ہسپتال لایا گیا جہاں وہ زخموں کی تاب نہ لاتے ہوئے زندگی کی بازی ہار گیا تو لواحقین نے نعش سڑک پر رکھ کر احتجاج کرتے ہوئے روڈ ٹریفک کیلئے بند کر دی تو پولیس نے موقع پر پہنچ کر متوفی کے لواحقین سے مذاکرات کے بعد نعش ورثاء کے حوالے کر دی۔