کراچی‘ نجی اسکول میں خاتون ٹیچر پر والدین کا بہیمانہ تشدد، اسلحے کے زور پر دھمکیاں

متاثرہ خاتون اور اسکول انتظامیہ کا اعلیٰ حکام سے واقعے کا نوٹس لینے اور ملوث افراد کے خلاف سخت کارروائی کا مطالبہ

بدھ 28 مئی 2025 15:38

کراچی (اُردو پوائنٹ اخبارتازہ ترین - این این آئی۔ 28 مئی2025ء)کراچی کے علاقے جمشید کوارٹر میں ایک نجی اسکول کی خاتون ٹیچر پر مبینہ طور پر طالبہ کے والدین اور رشتے داروں کی جانب سے تشدد اور دھمکیاں دینے کا افسوسناک واقعہ پیش آیا۔ پولیس کے مطابق واقعے کا مقدمہ جمشید کوارٹر تھانے میں متاثرہ خاتون کی مدعیت میں درج کر لیا گیا ہے۔ایف آئی آر کے متن کے مطابق، 16 مئی کو ٹیچر ماریہ نے طالبہ ایشال شاہد کو اسکول تاخیر سے آنے پر ڈانٹا تھا اور بطور معمولی سزا، کچھ دیر کے لیے کھڑا کیا۔

ایشال مبینہ طور پر اکثر دیر سے اسکول آتی تھی۔ واقعے کے بعد ایشال کی والدہ اسکول آئیں اور پرنسپل کے دفتر میں ٹیچر کو گالیاں دے کر چلی گئیں۔تاہم صورتحال اس وقت سنگین رخ اختیار کر گئی جب دو روز بعد طالبہ کے والد شاہد، ماموں عبدالحفیظ اور والدہ ایک بار پھر اسکول پہنچے۔

(جاری ہے)

ایف آئی آر کے مطابق اسکول انتظامیہ نے ان افراد کو اندر آنے سے روکا، مگر عبدالحفیظ، جو پولیس یونیفارم کی پینٹ پہنے ہوئے تھا، اس نے اسلحہ نکالا اور خود کو ایس ایچ او کلاکوٹ ظاہر کرتے ہوئے اسکول میں زبردستی داخل ہوا۔

ملزم عبدالحفیظ مبینہ طور پر اسلحہ کے زور پر اپنی بہن اور بہنوئی کو اندر لایا اور اسکول میں ٹیچر کو تلاش کرتے ہوئے ان کی کلاس میں جا گھسا، جہاں اس نے نہ صرف گالیاں دیں بلکہ جانی نقصان کی دھمکیاں بھی دیں۔متاثرہ ٹیچر کا کہنا ہے کہ پرنسپل کے کہنے پر وہ معذرت کے لیے دفتر آئیں، لیکن وہاں بھی انہیں زبانی بدسلوکی اور دھمکیوں کا سامنا کرنا پڑا۔پولیس نے مقدمہ درج کر کے تحقیقات شروع کر دی ہیں۔ متاثرہ خاتون اور اسکول انتظامیہ نے اعلیٰ حکام سے واقعے کا نوٹس لینے اور ملوث افراد کے خلاف سخت کارروائی کا مطالبہ کیا ہے۔