یونائیٹڈ سٹیٹس بارڈر پٹرول 101سالوں سے ملک کی سرحدوں کی حفاظت کی خدمات انجام دے رہا ہے.صدرٹرمپ

یوایس بی پی کے اہلکار دن رات سرحدوں پر منشیات، ہتھیاروں، مجرموں اور دہشت گردوں کے داخلے کو روکنے کے لیے اپنی جانیں خطرے میں ڈالتے ہیں.امریکی صدر کا پیغام

میاں محمد ندیم بدھ 28 مئی 2025 16:14

یونائیٹڈ سٹیٹس بارڈر پٹرول 101سالوں سے ملک کی سرحدوں کی حفاظت کی خدمات ..

واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔ 28 مئی ۔2025 )امریکی صدر ڈونلڈ ٹرمپ نے کہا کہ ” یونائیٹڈ سٹیٹس بارڈر پٹرول“ (یوایس بی پی)101سالوں سے ہماری خودمختاری اور وطن کی سرحدوں کے محافظوں کے طور پر خدمات انجام دے رہا ہے یوایس بی پی کے اہلکار دن رات سرحدوں پر منشیات، ہتھیاروں، مجرموں اور دہشت گردوں کے داخلے کو روکنے کے لیے اپنی جانیں خطرے میں ڈالتے ہیں.

(جاری ہے)

یونائیٹڈ سٹیٹس بارڈر پٹرول کے101سال مکمل ہونے پر اپنے بیان میں امریکی صدر نے کہا کہ یونائیٹڈ سٹیٹس بارڈر پٹرول کی سالگرہ پر ہم ادارے کے ہر ایجنٹ کو ان کی باوقار خدمات کے لیے خراج تحسین پیش کرتے ہیں اور امریکیوں کو محفوظ رکھنے کے ان کے مشن میں ان کا ساتھ دینے کا عہد کرتے ہیں انہوں نے کہا کہ بدقسمتی سے پچھلی حکومت نے دنیا کے خطرناک حصوں سے پرتشدد مجرموں، ٹھگوں، گینگ ممبروں اور دہشت گردوں سمیت غیر قانونی تارکین وطن کی بڑی تعداد کو ملک میں داخل ہونے دیا .

انہوں نے کہا کہ 20 جنوری 2025 کو ہم نے اسے تبدیل کیا اور بطور صدر میرے پہلے اقدامات میں سے ایک امریکا کی جنوبی سرحد پر قومی ہنگامی حالت کا اعلان کرنا تھا جس کے لیے وفاقی حکومت نے محکمہ دفاع کو اضافی اختیار اور مکمل حمایت فراہم کی . صدر ٹرمپ نے کہا کہ ہم نے جنوبی سرحد پر سرحدی دیوار کی تعمیر دوبارہ شروع کر دی ہے جبکہ میکسیکو کے ساتھ پالیسی مذکرات کوبحال کیا تاکہ سرحد پر غیرقانونی آمدورفت کو ختم کیا جاسکے انہوں نے کہاکہ ہزاروں امریکی فوجیوں کو سرحد کے دفاع اور حفاظت کے لیے تعینات کیا گیاہے جبکہ ہم نے غیرقانونی تارکین وطن کی ملکی تاریخ میں سب سے بڑی ملک بدری کی کاروائیاں شروع کررکھی ہیں.

صدر ٹرمپ نے کہا کہ عہدہ صدارت سنبھالنے کے پہلے 100 دنوں کے اندر سرحد پر غیرقانونی طور پر امریکا میں داخلے کے واقعات میں 95 فیصد کمی واقع ہوئی اسی طرح خطرناک منشیات” فینٹینیل“ کی اسمگلنگ پچھلے سال کے مارچ کے مقابلے میں 54 فیصد کم ہوئی‘ حکومت کے پہلے 100 دنوں میںہماری انتظامیہ نے 1 لاکھ50ہزار سے زیادہ غیرقانونی طور پر امریکا میں مقیم افراد کو گرفتار کیا جن میں سے 1لاکھ35ہزار سے زیادہ کو ملک بدر کیا گیا .