9 مئی کیسز، ڈاکٹر یاسمین راشد سمیت 9 ملزمان کو 10 سال قید کی سزا

انسداد دہشت گردی عدالت نے شیر پاو پل مقدمے میں شاہ محمود قریشی کو بری کر دیا، سابق گورنر عمر سرفراز چیمہ، سینیٹر اعجاز چودھری، میاں محمود الرشید کو بھی 10،10 سال قید کی سزا سنا دی گئی

محمد علی منگل 22 جولائی 2025 23:15

لاہور(اُردو پوائنٹ اخبارتازہ ترین۔ 22 جولائی2025ء) 9 مئی کیسز، ڈاکٹر یاسمین راشد سمیت 9 ملزمان کو 10 سال قید کی سزا، انسداد دہشت گردی عدالت نے شیر پاو پل مقدمے میں شاہ محمود قریشی کو بری کر دیا ۔ تفصیلات کے مطابق انسداد دہشت گردی عدالت لاہور نے 9 مئی کے مقدمہ میں پاکستان تحریک انصاف کے رہنما اور سابق وزیر خارجہ شاہ محمود قریشی کو بری کردیا جبکہ سابق صوبائی وزیر ڈاکٹر یاسمین راشد اور میاں محمود الرشید کو 10،10 سال قید کی سزا سنا دی۔

انسداد دہشت گردی عدالت کی جانب سے شیر پاو پل مقدمے کا فیصلہ سنا دیا گیا جس کے مطابق سابق وزیر خارجہ شاہ محمود قریشی اور حمزہ عظیم سمیت 6 ملزمان کو بری کر دیا گیا ہے۔ لاہور کی انسداد دہشت گردی کی خصوصی عدالت کے جج ارشد جاوید نے کوٹ لکھپت جیل میں ٹرائل مکمل ہونے پر تھانہ سرور روڈ کے مقدمہ نمبر 97/23 کا محفوظ فیصلہ سنایا۔

(جاری ہے)

عدالت کی جانب سے مقدمے میں 9 ملزمان کو 10، 10 سال قید کی سزا بھی سنائی گئی ہے جن میں سابق صوبائی وزیر ڈاکٹر یاسمین راشد شامل ہیں ۔

عدالت نے سابق گورنر عمر سرفراز چیمہ، سینیٹر اعجاز چودھری، میاں محمود الرشید، خالد قیوم ،ریاض حسین ،علی حسن ،افضال عظیم پاہٹ کو بھی 10، 10 سال قید کی سزا کا حکم سنایا۔ اس سے قبل سرگودھا کی انسداد دہشت گردی عدالت نے بھی تحریک انصاف کے رہنماوں کو 10،10 سال قید کی سزائیں سنائیں۔ 9 مئی کے مقدمہ میں سرگودھا کی انسداد دہشت گردی عدالت کی جانب سے پی ٹی آئی سے تعلق رکھنے والے اپوزیشن لیڈر پنجاب اسمبلی ملک احمد خان بچھر کو دس سال قید کی سزا سنائی گئی ہے، سزا کی وجہ سے ممکنہ طور پر ان کی نااہلی ہوگی جس کے نتیجے میں وہ ڈی سیٹ ہو جائیں گے اور یہ نشست خالی ہو جائے گی۔

بتایا گیا ہے کہ موسیٰ خیل میانوالی پولیس سٹیشن کے نو مئی کے کیس میں انسداد دہشت گردی سرگودھا نے اپنے فیصلے میں پی ٹی آئی سے متعلقہ 32 ملزمان کو بھی دس دس سال قید کی سزا سنا دی۔ اس سے پہلے اسلام آباد میں انسداد دہشت گردی کی عدالت بھی نو مئی کے واقعات سے متعلق ایک مقدمے میں پاکستان تحریک انصاف کے رہنما اور رکن قومی اسمبلی عبدالطیف، سابق رکن صوبائی اسمبلی وزیر زادہ کیلاشی سمیت 11 افراد کو 10 سال قید کی سزائیں سنا چکی ہے۔