فرانس نے دو ریاستی حل کی شرط پر فلسطین کوتسلیم کرنے کا عندیہ دے دیا

جمعہ 30 مئی 2025 22:09

پیرس (اُردو پوائنٹ اخبارتازہ ترین - آن لائن۔ 30 مئی2025ء)مشرق وسطیٰ کی بگڑتی ہوئی صورتحال پر عالمی برادری کی نظریں جم چکی ہیں۔ ایسے میں فرانس کے صدر ایمانویل میکرون کا فلسطین کو شرائط کے ساتھ تسلیم کرنے کا عندیہ ایک اہم سفارتی پیش رفت کے طور پر سامنے آیا ہے، جو نہ صرف انسانی حقوق بلکہ انصاف کے تقاضوں کی بھی عکاسی کرتا ہے۔فرانس کے صدر ایمانویل میکرون نے ایک بار پھر فلسطین کے دو ریاستی حل کی حمایت کرتے ہوئے مشرق وسطیٰ میں اسرائیلی پالیسیوں پر سخت تحفظات کا اظہار کیا ہے۔

ح*جکارتا میں انڈونیشین صدر پرابووو سبیانتو کے ہمراہ پریس کانفرنس کرتے ہوئے صدر میکرون نے کہا کہ، ’فلسطینیوں کو جبری طور پر بے گھر کرنے کا اسرائیلی منصوبہ ناقابل قبول ہے، اور فلسطینی ریاست کو شرائط کے ساتھ تسلیم کرنا فرانس کا اخلاقی فرض ہے۔

(جاری ہے)

‘انہوں نے کہا کہ جب تک غزہ کی صورتحال میں بہتری نہیں آتی، اسرائیل کے حوالے سے فرانس کو اپنا مؤقف سخت کرنا ہو گا۔

ان کا کہنا تھا کہ فرانس کی خارجہ پالیسی کسی قسم کے دوہرے معیار پر مبنی نہیں۔انڈونیشیا کی بھی فلسطین کے دو ریاستی حل کی مکمل حمایت کرتے ہوئے صدر پرابووو سبیانتو نے بھی فلسطین کے حق میں آواز بلند کرتے ہوئے کہا کہ، ’دو ریاستی حل ہی مشرق وسطیٰ میں پائیدار امن کی ضمانت ہے۔‘یاد رہے کہ اکتوبر 2023 سے اب تک اسرائیلی حملوں میں غزہ میں 54 ہزار سے زائد فلسطینی شہید ہو چکے ہیں، جن میں بڑی تعداد خواتین اور بچوں کی ہے۔ عالمی سطح پر ان حملوں کو انسانی حقوق کی سنگین خلاف ورزی قرار دیا جا رہا ہے۔