میڈیا معاشرے کا چوتھا ستون ہونے کے ناطے عوامی مسائل کو اجاگر کرنے، پالیسی سازوں تک پہنچانے اور ان کے حل میں مثبت کردار ادا کرتا ہے، ڈپٹی کمشنر

اتوار 1 جون 2025 21:10

? فیصل آباد (اُردو پوائنٹ اخبارتازہ ترین - آن لائن۔ 01 جون2025ء) ڈپٹی کمشنر فیصل آباد کیپٹن (ر) ندیم ناصر نے کہا ہے کہ میڈیا معاشرے کا چوتھا ستون ہونے کے ناطے عوامی مسائل کو اجاگر کرنے، پالیسی سازوں تک پہنچانے اور ان کے حل میں مثبت کردار ادا کرتا ہے۔ انہوں نے کہا کہ ضلعی انتظامیہ فیصل آباد میڈیا کے ساتھ مربوط روابط کو فروغ دے کر عوامی خدمت کے مشن کو مزید مؤثر،شفاف اور نتیجہ خیز بنانا چاہتی ہے تاکہ شہریوں کو بروقت اور معیاری سہولیات کی فراہمی یقینی بنائی جا سکے۔

انہوں نے یہ بات اپنے دورہ فیصل آباد پریس کلب کے موقع پر صحافی برادری سے گفتگو کرتے ہوئے کہی۔ اس موقع پر پریس کلب کے صدر،عہدیداران اور سینئر صحافی بھی موجود تھے۔ڈپٹی کمشنر نے کہا کہ میڈیا نہ صرف پل کا کردار ادا کرتا ہے بلکہ حکومتی اقدامات کی مؤثر تشہیر اور فیلڈ سطح پر کارکردگی کی عکاسی کے ذریعے ضلعی انتظامیہ کی رہنمائی کا ذریعہ بھی بنتا ہے۔

(جاری ہے)

ڈپٹی کمشنر نے وزیر اعلیٰ پنجاب مریم نواز شریف کی خصوصی ہدایات پر تیار کردہ فیصل آباد ڈویلپمنٹ پیکج کے خدوخال سے بھی آگاہ کیا۔انہوں نے کہا کہ شہریوں کی فلاح و بہبود، مسائل کا بروقت حل اور جدید شہری سہولیات کی فراہمی حکومت پنجاب کا اولین مقصد ہے جس کے حصول کے لئے ضلعی انتظامیہ ہمہ وقت کوشاں ہے۔ انہوں نے پریس کلب کے کردار کو سراہتے ہوئے کہا کہ میڈیا اور انتظامیہ کے باہمی تعاون سے فیصل آباد کو ایک جدید، صاف، محفوظ اور ترقی یافتہ شہر بنایا جائے گا۔

صدر پریس کلب شاہد علی،جنرل سیکرٹری عزادارعابدی ودیگر عہدیداران سمیت سینئر صحافی مقبول احمد لودھی،غلام عباس تنویر نے دورہ کرنے پر ڈپٹی کمشنر کا شکریہ ادااور انہیں صحافی برداری کی فلاح وبہبود کے اقدامات سے آگاہ کیا۔انہوں نے ضلع کی تعمیر و ترقی کے لئے کیپٹن (ر)ندیم ناصر کی کاوشوں کو سراہا اور صحافی برادری کی طرف سے ہر ممکن تعاون کی یقین دہانی کرائی۔