ڈیفنس تشدد کیس، عدالت نے ملزم سلمان فاروقی کی ضمانت مسترد کردی

کراچی کی جوڈیشل مجسٹریٹ جنوبی نے محفوظ کیاگیا فیصلہ سنا دیا، عدالت کی دونوں ملزمان کو جوڈیشل ریمانڈ پر جیل بھیجنے کا حکم تفتیشی افسر کو آئندہ سماعت پر پیش رفت رپورٹ پیش کرنے کی ہدایت

فیصل علوی جمعرات 5 جون 2025 12:50

ڈیفنس تشدد کیس، عدالت نے ملزم سلمان فاروقی کی ضمانت مسترد کردی

کراچی(اردوپوائنٹ اخبار تازہ ترین۔05 جون 2025)کراچی کی جوڈیشل مجسٹریٹ جنوبی کی عدالت نے ڈیفنس تشدد کیس میں ملزم سلمان فاروقی کی ضمانت کی درخواست مسترد کر دی،عدالت نے محفوظ کیا گیا فیصلہ سنا دیا،عدالت نے متاثرہ نوجوان کے بیان کے بعد ملزمان کی درخواست ضمانت پر فیصلہ سناتے ہوئے اسے مسترد کردیا، متاثرہ نوجوان نے دونوں ملزمان کو شناخت کر لیا۔

عدالت نے ابتدائی سماعت کے بعد دونوں ملزمان کو جوڈیشل ریمانڈ پر جیل بھیجنے کا حکم جاری کیا اور تفتیشی افسر کو آئندہ سماعت پر پیش رفت رپورٹ پیش کرنے کی ہدایت کی۔قبل ازیں دوران سماعت متاثرہ نوجوان سدھیر بھی عدالت میں پیش ہوا ،تشدد کا نشانہ بننے والے نوجوان سدھیر نے عدالت میں ملزم سلمان فاروقی کو معاف کر دیا،سدھیر نے عدالت میں بیان دیتے ہوئے کہا کہ میں کوئی کیس نہیں کرنا چاہتا،ملزم کو معاف کر دیا ہے۔

(جاری ہے)

کراچی کی جوڈیشل مجسٹریٹ جنوبی کی عدالت میں ڈیفنس تشدد کیس کی سماعت ہوئی تھی۔ پولیس نے مقدمے میں نامزد ملزم سلمان فاروقی ودیگر کو عدالت میں پیش کیاتھا۔سماعت کے دوران عدالت نے متاثرہ نوجوان سدھیر سے دریافت کیا کہ کیا اسے کسی قسم کے دباو یا خطرے کا سامنا ہے؟ جس پر نوجوان نے جواب دیا کہ میں کوئی کیس نہیں کرنا چاہتا، میں نے ملزم کو معاف کر دیا ہے، عدالت جو بھی فیصلہ کرے مجھے کوئی اعتراض نہیں۔

سدھیر نے عدالت کے روبرو ملزم کی شناخت کرتے ہوئے بیان دیا کہ مجھے علم نہیں تھا کہ عدالت نے بلایا ہے آج وکیل کے کہنے پر پیش ہوا ہوں۔ واضح رہے کہ اس سے قبل کراچی کے علاقے ڈیفنس میں نوجوان پر تشدد کے الزام میں گرفتار ملزم سلمان فاروقی کی عدالت میں پیشی کے موقع پر وکلاءاور شہریوں نے احاطہ عدالت میں پٹائی کر دی تھی۔عدالت سے واپسی پر ملزمان کو لے جاتے ہوئے احاطے میں موجود سائلین نے شور مچایاتھا۔ سائیلین نے ملزمان کو دیکھ کر کہا مارو مارو جس پر پولیس ملزمان کو بھگاتے ہوئے موبائل تک لے گئی اور سٹی کورٹ سے روانہ ہوگئی تھی۔