حافظ آباد میں شوہر کے سامنے بیوی کے گینگ ریپ کا ایک ملزم مارا گیا

ملزمان کی گرفتاری کے لیے چھاپے کے دوران ملزم اور اس کے ساتھیوں نے پولیس پر فائرنگ کردی؛ پولیس

ساجد علی جمعرات 5 جون 2025 16:46

حافظ آباد میں شوہر کے سامنے بیوی کے گینگ ریپ کا ایک ملزم مارا گیا

حافظ آباد ( اُردو پوائنٹ اخبارتازہ ترین۔ 05 جون 2025ء ) صوبہ پنجاب کے ضلع حافظ آباد میں شوہر کے سامنے خاتون کے گینگ ریپ کا ایک ملزم مارا گیا۔ پنجاب پولیس کے مطابق حافظ آباد میں شوہر کے سامنے خاتون سے اجتماعی زیادتی کرنے والا ایک ملزم پولیس مقابلے میں اپنے ہی ساتھیوں کی فائرنگ سے ہلاک ہوگیا، یہ واقعہ اس وقت ہوا جب خاتون سے اجتماعی زیادتی میں ملوث ملزمان کی گرفتاری کے لیے چھاپے کے دوران ملزم اور اس کے ساتھیوں نے پولیس پر فائرنگ کردی اور وہاں سے فرار ہوگئے، اس دوران فائرنگ کا تبادلہ ہوا جس میں ملزم اپنے ساتھیوں کی گولی لگنے سے ہلاک ہوگیا۔

بتایا جارہا ہے کہ حافظ آباد میں جوڑے کو اغواء کرنے کے بعد ملزمان نے شوہر کے سامنے بیوی کا گینگ ریپ کیا، متاثرین نے واقعے کی ایف آئی آر درج کراتے ہوئے بتایا کہ ان پر متعدد مسلح افراد نے حملہ کیا اور اغواء کرنے کے بعد ایک قبرستان کے قریب ویران جگہ پر لے گئے جہاں انہیں جسمانی تشدد اور خاتون کو جنسی زیادتی کا نشانہ بنایا گیا اور ان سے سامان بھی چھین لیا، شوہر کی جانب سے بار بار جنسی زیادتی سے روکنے کی درخواست کے باوجود ملزمان نے اس کی بیوی کا گینگ ریپ کیا اور اس کی ویڈیو بنانے کے بعد انہیں بلیک میل بھی کرتے رہے۔

(جاری ہے)

ایف آئی آر کے متن میں کہا گیا کہ جوڑے نے واقعے کی اطلاع دینے میں تاخیر کی کیوں کہ ملزمان نے دھمکی دی تھی کہ اگر قانونی کارروائی کی یا طبی معائنہ کرایا تو وہ جان سے مار دیں گے لیکن ملزمان نے حملے کی فوٹیج انٹرنیٹ پر اپ لوڈ کردی ہمیں جلد از جلد انصاف فراہم کیا جائے، جس کے لیے پولیس کو کل 8 مشتبہ افراد میں سے 4 کے نام بتادیئے ہیں۔ ڈی پی او حافظ آباد عاطف نذیر نے بتایا کہ جوڑے کا طبی معائنہ کرایا گیا ہے اور دیگر قانونی پہلوؤں کی تحقیقات جاری ہیں، ملزمان کے خلاف مقدمہ درج کر لیا گیا ہے جنہیں 24 سے 48 گھنٹوں میں گرفتار کرلیا جائے گا، مشتبہ افراد کی ویڈیو فوٹیج کے ذریعے شناخت کی جا رہی ہے اور ان کی گرفتاری کے لیے پولیس کی جانب سے چھاپے بھی مارے جارہے ہیں۔