خیبرپختونخواہ اپنے پاوں پر کھڑا ہوگیا، وفاقی حکومت ہم سے امداد مانگ رہی ہے، علی امین گنڈا پورکا دعویٰ

صوبے کے ریونیو سے وفاق کو بھی قرضہ دے سکتے ہیں، صوبہ اس وقت اس پوزیشن میں ہے کہ وہ دیگر کو امداد فراہم کر سکتا ہے، خیبرپختونخوا ہ ترقی کی راہ پر گامزن رہے گا اور عوام کی فلاح و بہبود کیلئے اقدامات جاری رکھے جائیں گے

فیصل علوی پیر 9 جون 2025 10:27

خیبرپختونخواہ اپنے پاوں پر کھڑا ہوگیا، وفاقی حکومت ہم سے امداد مانگ ..

پشاور(اردوپوائنٹ اخبار تازہ ترین۔09 جون 2025) وزیراعلیٰ خیبرپختونخواہ علی امین گنڈاپورنے دعویٰ کیا ہے کہ خیبرپختونخواہ اپنے پاوں پر کھڑا ہوگیا، وفاقی حکومت اب ہم سے امداد مانگ رہی ہے اور ہم امداد دینے کی حیثیت بھی رکھتے ہیں،صوبے کے ریونیو سے وفاق کو بھی قرضہ دے سکتے ہیں،اپنے ایک بیان میں وزیراعلیٰ خیبرپختونخواہ کا کہنا ہے کہ صوبہ معاشی طور پر مستحکم ہو رہا ہے۔

ہماری معاشی ترقی کا اندازہ اس بات سے لگایا جا سکتا ہے کہ آج وفاقی حکومت ہم سے امداد مانگ رہی ہے، صوبہ اس وقت اس پوزیشن میں ہے کہ وہ دیگر کو امداد فراہم کر سکتا ہے جو کہ ایک بڑی کامیابی ہے۔انہوں نے کہا کہ خیبرپختونخوا ہ ترقی کی راہ پر گامزن رہے گا اور عوام کی فلاح و بہبود کیلئے اقدامات جاری رکھے جائیں گے۔

(جاری ہے)

وفاقی حکومت نے افغانستان کیساتھ مذاکرات شروع کر دیے ہیں، ہم چاہتے ہیں کہ صوبے کے جرگہ ممبران کو بھی اس میں شامل کیا جائے۔

افغانستان کا مسئلہ طاقت سے نہیں بلکہ مذاکرات کے ذریعے حل ہونا چاہیئے۔ خطے میں پائیدار امن کیلئے تمام فریقین کو سنجیدگی کے ساتھ بات چیت کا راستہ اختیار کرنا ہوگا۔یاد رہے کہ اس سے قبل مشیر اطلاعات خیبر پختونخوا ہ حکومت مزمل اسلم نے کہا تھا کہ آئندہ بجٹ میں کوئی نیا ٹیکس نافذ کرنے کا ارادہ نہیں تھا۔حکومت کا فوکس ٹیکس نیٹ کو وسعت دینے اور موثر عملدرآمد پر ہوگا تاکہ مالیاتی خودکفالت کی طرف بڑھا جا سکے۔

بجٹ میں صرف ٹیکس نیٹ کو وسیع کرنے اور بہتر عمل درآمد پر توجہ دی جائے گی۔صوبے میں ٹیکس محصولات کے حوالے سے اپنے بیان میں مزمل اسلم کا کہنا تھا کہ خیبر پختونخواہ کی 11 ماہ کی ٹیکس آمدن میں گزشتہ سال کے مقابلے میں 40 فیصد اضافہ ہوا تھا اسی طرح ہماری نان ٹیکس آمدن میں بھی 50 فیصد سے زائد اضافہ ہوا تھا۔خیبرپختونخوا ہ کے ٹیکس دہندگان کی تشویش کو بھی کم اور واضح کرتا ہوں۔

انہوں نے کہا تھاکہ ہم آئندہ سال کیلئے بھی اپنے لئے 40 فیصد کا ٹیکس ہدف مقرر کر رہے ہیں۔ خیبرپختونخوا ہ میں کوئی نیا ٹیکس نافذ کرنے کا ارادہ نہیں تھا۔قبل ازیں بھی خیبرپختونخواہ کے مشیر اطلاعات برائے خزانہ مزمل اسلم کا کہنا تھا کہ نیا وفاقی بجٹ آئے گا تو آئی ایم ایف کی نئی شرائط بانی پی ٹی آئی عمران خان سے ڈسکس کریں گے،اگلے بجٹ کے حوالے سے بانی پی ٹی آئی سے مشاورت بہت ضروری تھا۔ بانی پی ٹی آئی بجٹ کے حوالے سے ہمیں مزید گائیڈنس دیں گے۔میڈیا سے گفتگو کرتے ہوئے مشیرخزانہ خیبرپختونخواہ کاکہنا تھا کہ ضم اضلاع کے پیسے وقت پر نہ دئیے گئے تو ہمارا سرپلس بجٹ متاثر ہوسکتا تھا۔صوبے کے مالی بجٹ کے حوالے سے بانی پی ٹی آئی سے کئی امور پر تبادلہ خیال ضروری تھا۔