اٹلی نے اسرائیلی کمپنی پیراگون کے ساتھ جاسوسی میں تعاون کا معاہدہ ختم کر دیا

منگل 10 جون 2025 10:10

روم (اُردو پوائنٹ اخبارتازہ ترین - اے پی پی۔ 10 جون2025ء) اٹلی نے اسرائیلی کمپنی پیراگون کے ساتھ جاسوسی میں تعاون کا معاہدہ ختم کر دیا ۔ العربیہ کے مطابق ایک پارلیمانی دستاویز کے مطابق اٹلی نے اسرائیلی کمپنی "پیراگون" کے ساتھ اپنا معاہدہ ختم کر دیا ہے، یہ کمپنی جاسوسی کے لئے سافٹ ویئر فراہم کرتی ہے۔ یہ فیصلہ اس وقت سامنے آیا جب حکومت پر الزام لگا کہ اس نے اس ٹیکنالوجی کو حکومت کے ناقدین کے موبائل فونز کی جاسوسی کے لئے استعمال کیا۔

"میٹا" کمپنی کی ملکیت واٹس ایپ نے اس سال انکشاف کیا تھا کہ پیراگون کا جاسوسی سافٹ ویئر درجنوں صارفین کو نشانہ بنا چکا ہے، جن میں ایک صحافی اور بحیرہ روم میں پناہ گزینوں کو بچانے والی تنظیم "میڈیترانیا" کے افراد شامل تھے، جو اٹلی کی وزیراعظم جارجیا میلونی پر تنقید کرتے رہے ہیں۔

(جاری ہے)

اٹلی کی حکومت نے فروری میں تصدیق کی کہ یہ سافٹ ویئر ملک کے اندر سات افراد کے موبائل فونوں پر استعمال ہوا، لیکن انھوں نے کسی غیر قانونی سرگرمی میں ملوث ہونے کی تردید کی اور قومی سائبر سکیورٹی ایجنسی سے تحقیقات کی ہدایت دی۔

حال ہی میں شائع ہونے والی پارلیمانی سکیو رٹی کمیٹی کی رپورٹ کے مطابق، اٹلی کی انٹیلی جنس ایجنسیوں نے ابتدائی طور پر یہ معاہدہ معطل کیا اور بعد میں میڈیا میں غصے کا اظہار سامنے آنے کے بعد مکمل طور پر ختم کر دیا۔ رپورٹ میں کہا گیا ہے کہ مقامی اور غیر ملکی انٹیلی جنس ایجنسیوں نے 2023 اور 2024 میں محدود تعداد میں افراد پر، پبلک پراسیکیوٹر کی اجازت سے، یہ سافٹ ویئر استعمال کیا۔رپورٹ کے مطابق، غیر ملکی انٹیلی جنس ایجنسی نے یہ سافٹ ویئر مفروروں کی تلاش، غیر قانونی ہجرت، دہشت گردی، منظم جرائم، ایندھن کی اسمگلنگ، جاسوسی اور داخلی سلامتی کی سرگرمیوں کے لئے استعمال کیا۔