Live Updates

حکومت کا بیواوں کی پنشن صرف 10 سال کیلئے محدود کرنے کا فیصلہ

شریک حیات کے انتقال کے بعد فیملی پنشن کی مدت 10 سال تک محدود کی گئی ہے، ایک سے زائد پنشنز کا خاتمہ کیا گیا ہے، وزیر خزانہ

محمد علی منگل 10 جون 2025 23:23

اسلام آباد(اُردو پوائنٹ اخبارتازہ ترین۔ 10 جون2025ء) حکومت کا بیواوں کی پنشن صرف 10 سال کیلئے محدود کرنے کا فیصلہ۔ تفصیلات کے مطابق وفاقی حکومت کی جانب سے کی گئی پنشن اصلاحات بجٹ 26-2025 میں سامنے آگئی ہیں جس کے تحت ایک سے زائد پنشنز کا خاتمہ کیا گیا ہے۔وفاقی وزیر خزانہ نے بجٹ تقریر میں بتایا کہ پچھلی کچھ دہائیوں میں پنشن اسکیم میں ایگزیکٹو آرڈرز کے ذریعے تبدیلیاں کی گئیں جس کی وجہ سے سرکاری خزانے پر بوجھ بڑھا، پنشن اسکیم کو درست کرنے اور سرکاری خزانے پر بوجھ کو کم کرنے کیلئے حکومت نے پنشن اسکیم میں اصلاحات کی ہیں۔

وزیر خزانہ نے کہا کہ پنشن اسکیم میں جو اصلاحات کی گئی ہیں ان میں قبل از وقت ریٹائرمنٹ کی حوصلہ شکنی اور پنشن میں اضافہ کنزیومر پرائس انڈیکس سے منسلک کیا گیا ہے۔

(جاری ہے)

وزیر خزانہ نے بتایا کہ شریک حیات کے انتقال کے بعد فیملی پنشن کی مدت 10 سال تک محدود کی گئی ہے جبکہ ایک سے زائد پنشنز کا خاتمہ کیا گیا ہے۔ ریٹائرمنٹ کے بعد دوبارہ ملازمت کی صورت میں پنشن یا تنخواہ میں سے کسی ایک کا انتخاب کرنا ہوگا۔

دوسری جانب حکومت کی جانب سے ریٹائرڈ سرکاری ملازمین کی پنشن میں بھی صرف 7 فیصد اضافے کا فیصلہ کیا گیا ہے۔ وزراء، اسپیکر قومی اسمبلی، چئیرمین سینیٹ اور اراکین اسمبلی کی تنخواہوں میں کئی سو فیصد اضافہ کرنے والی حکومت نے سرکاری ملازمین کی تنخواہ اور پنشن میں معمولی سا اضافہ کیا ۔